काठमाडौं । नेकपा एमाले र नेकपा माआवादीका बिचमा बनेको गठबन्धनभित्र असमझदारी बढ्न थालेको छ ।
पुस १९ गते एमालेसहितका दलको समर्थनमा प्रधानमन्त्री बनेका प्रचण्डलाई कांग्रेसले समेत विश्वासको मत दिएपछि एमालेसँगको दुरी बढ्ने अबस्था देखिएको हो । सरकार सञ्चालनको मुख्य जिम्मेवारी प्रचण्डले लिएको भएपनि सत्ताको चावी भने एमाले अध्यक्ष केपी शर्मा ओलीसँग रहेको छ ।
राप्रपा र राष्ट्रिय स्वतन्त्र पार्टीलाई सरकारमा सहभागी गराउने मात्रै होइन, रवि लामिछानेलाई गृहमन्त्री बनाउने मुख्य भूमिका समेत एमाले अध्यक्ष ओलीको रहेको छ । एमालेबाट सरकारमा सहभागी भएका विष्णु पौडेलबाहेक अन्य नेताहरु पहिलोपटक सरकारमा जानेमध्येका रहेका छन् ।
रवि लामिछानेलाई उपप्रधानसहित गृह मन्त्रालयको नेतृत्व दिएपछि उनीभन्दा तल्लो मर्यादाक्रममा रहेर एमाले र माओवादीकै नेताहरु सरकारमा सहभागी नहुने समेत देखिएको छ । यसरी गठबन्धनभित्र एकखाले असमझदारी देखिएका बेला कांग्रेसले समेत वर्तमान सरकारलाई विश्वासको मत दिएपछि प्रचण्ड नेतृत्वको सरकारप्रति नै एमालेको दृष्टिकोण शंकास्पद अबस्थामा पुगेको छ ।
कांग्रेसले विश्वासको मत दिएपछि संसद बैठकमा एमाले अध्यक्ष केपी शर्मा ओलीले कांग्रेसले कुनै पनि पद पाउने आशाले विश्वासको मत दिएको भए सफल नहुने भनेका थिए । तर त्यसको ठिक विपरित प्रधानमन्त्री प्रचण्डले भने सभामुख र राष्ट्रपति चुनावका बारेमा कांग्रेससँग समेत छलफल गर्ने बताएका छन् ।
कांग्रेससँग छलफल गर्ने विषय देखिदा सामान्य देखिएपनि यसले माओवादी केन्द्रको नीति के होला भन्ने चासो शुरु भएको छ । कांग्रेसका एक शिर्ष नेताका अनुसार विश्वासको मत माग्न पुगेका प्रधानमन्त्री प्रचण्ड र कांग्रेस सभापति शेरबहादुर देउवाका बिचमा केही ‘अण्डरस्ट्याण्डिङ’ भएको थियो । त्यसकै असर अहिले देखिन थालेको छ । यसले अहिलेको सत्ता गठबन्धनभित्र समस्या देखिनसक्ने आँकलन शुरु भएको छ ।
