म्याग्दी (बेनी)। म्याग्दीको रघुगंगा गाउँपालिकाको सुविधा सम्पन्न प्रशासकीय भवन निर्माण सुरु भएको छ। गाउँपालिकाको केन्द्र मौवा फाँटमा निःशुल्क रूपमा समुदायबाट जग्गा व्यवस्थापन भएपछि पालिकाको प्रशासकीय भवन निर्माण सुरु गरिएको हो। शुक्रबार धार्मिक विधि पूर्वक पूजा आजासहित गाउँपालिका अध्यक्ष भवबहादुर भण्डारीले प्रशासकीय भवनको शिलान्यास गरेका छन्।
गाउँपालिकाले चालु आर्थिक वर्ष २०८१/०८२ मा विनियोजन गरेको २ करोड रुपैयाँ बजेटबाट प्रशासकीय भवन निर्माण सुरु गरेको हो। मातृभूमि डेभलपर एन्ड इन्जिनियरिङ प्रालिले १ करोड ३१ लाख ९८ हजार रुपैयाँमा ठेक्का सम्झौता गरेर कार्य क्षेत्रमा परिचालन भएको छ।
दुई वर्षमा भवन निर्माण कार्य सम्पन्न गर्ने लक्ष्यसहित भवनको शिलान्यास गरी निर्माण कार्य अघि बढाइएको गाउँपालिका अध्यक्ष भण्डारीले जानकारी दिए। उनका अनुसार, ९ करोड ४० लाख ४४ हजार ९५० रुपैयाँ लागत अनुमान गरिएको भवन निर्माणको लागि थप बजेटका लागि गण्डकी प्रदेश सरकार र सङ्घीय सरकारमा प्रस्ताव पेस गरिएको छ।
गाउँपालिकाले ६ वर्ष अघिदेखि प्रशासकीय भवन निर्माणको लागि जग्गा व्यवस्थापनको काम सुरु गरेको थियो। “करोडौँ मूल्य पर्ने जग्गालाई समुदायबाट निःशुल्क उपलब्ध भएको छ, गाउँपालिकाको प्रशासकीय भवन निर्माण सुरु हुनुमा जग्गाधनीको ठूलो योगदान छ, हामीले पालिकाको सेवालाई सरल र सहज बनाउन पालिकालाई पूर्वाधारयुक्त बनाउनका लागि भवन बनाउने गौरवको योजना अघि बढाएका हौँ,” गाउँपालिका अध्यक्ष भण्डारीले भने।
यस वर्ष भवनको जग बसालेर स्टक्चर र पहिलो तला ढलानको काम सम्पन्न हुने गाउँपालिकाका सिनियर सब इञ्जिनियर कमलबहादुर चोखालले बताए। तीन तलामा ३३ वटा कोठा र सभाहलसहितको सुविधा सम्पन्न भवन निर्माणका लागि जग्गा सम्माएर जग बसाउने काम सुरु भएको उनले जानकारी दिए। निर्माण व्यवसायीले भवन निर्माणका लागि आवश्यक पर्ने निर्माण सामग्री र उपकरणको बन्दोबस्तसँगै जनशक्ति कार्यक्षेत्रमा परिचालन गरेको जनाएको छ।
रघुगंगा गाउँपालिकालाई समुदायबाट २७ जनाले १४ रोपनी जग्गा निःशुल्क उपलब्ध गराएका छन्। करोडौँ मूल्य पर्ने जग्गा गाउँपालिकाको भवनको लागि निःशुल्क उपलब्ध भएपछि दुई वर्षअघि गाउँपालिकाले निर्माण गरेको बहुउद्देश्यीय भवनबाट सेवा प्रवाह गर्दै आएको छ। बहुउद्देश्यीय भवनलाई कर्मचारी आवास गृहको रूपमा उपयोग गर्ने र सुविधा सम्पन्न भवन निर्माण गरेर नागरिकलाई सरल र सहज रूपमा सेवा उपलब्ध गराउने उद्देश्यले प्रशासकीय भवन निर्माण गर्न लागिएको गाउँपालिका अध्यक्ष भण्डारीले बताए।
गाउँपालिकाको भवन निर्माण प्रयोजनका लागि २७ जना जग्गा धनीको २५ रोपनी जग्गा एकीकरण गरी प्लटिङ गरिएको थियो। जग्गा व्यवस्थापन कार्य विधिअनुसार, करिब १४ रोपनी जग्गा गाउँपालिकाको नाममा पास गरिएको छ भने जग्गा धनीलाई छ रोपनी जग्गा घडेरीको रूपमा फिर्ता गरिएको छ। बाँकी जग्गालाई उपयोग गरी पालिकाको वरिपरि आठ मिटर फराकिलो सडकको चक्रपथ बनाइएको छ।
