काठमाडौं । सर्लाही जिल्लामा एकजना मुस्लिम समुदायका तस्लीम अन्सारीमाथि अमानवीय व्यवहार गरिएको घटना सार्वजनिक भएको छ। विवाहको तयारीका क्रममा गरगहना बनाउने विषयमा विवाद हुँदा उनलाई सुंगुरको खोरमा थुनेर कुटपिट गरिएको हो।
पर्सा गाउँपालिका–५ निवासी अन्सारीले छोरीको बिहेमा लगाइने गहना अर्का सुन व्यवसायीमार्फत बनाउने निर्णय गरेका थिए। सोही विषयलाई लिएर स्थानिय सुनचाँदी व्यापारी राजेन्द्र साह सोनारले अन्य व्यक्तिहरूको सहयोगमा अन्सारीलाई अपमानजनक तरिकाले कुटपिट गरेका हुन्।
घटनाको जानकारी पाएपछि सर्लाही प्रहरीले तत्काल कारबाही गर्दै १० जनालाई नियन्त्रणमा लिएको छ। पक्राउ पर्नेमा राजेन्द्र साह सोनार, उनका छोरा कमलेश साह, अन्सारीका आफन्तहरूसहित अन्य स्थानीय युवाहरू छन्। जिल्ला प्रहरी कार्यालय सर्लाहीका डिएसपी सरोज राईका अनुसार, घटनाको अनुसन्धान जारी छ र कानुनी प्रक्रिया अघि बढाइनेछ।
यो घटनासँग सम्बन्धित भिडियोहरू सामाजिक सञ्जालमा भाइरल बनेका छन्, जसले सर्वसाधारणमा आक्रोश फैलाएको छ। स्थानीयले यो घटनालाई धार्मिक र मानवीय मर्यादाविरुद्धको कार्य भन्दै दोषीहरूलाई कडा कारबाही गर्न माग गरेका छन्।
पीडितका छोरा कौशर अन्सारी भन्छन्, हाम्रो धर्म अनुसार सुंगुर अपवित्र मानिन्छ, त्यस्तो खोरमा राखेर बाबुलाई पिट्नु हाम्रो आत्मसम्मानमाथिको ठेस हो।
