नयाँ दिल्लीः भारतका विदेश मन्त्रालयका प्रवक्ताले चीनसँगको भारतको सम्बन्धको समग्र विकासका लागि वास्तविक नियन्त्रण रेखा (एलएसी) मा शान्ति हुनु पर्ने बताएका छन् । चीन र भारतको एलएसीमा हालको सीमा तनावलाई कम गर्न चिनियाँ विदेशमन्त्री पनि इच्छुक देखिएका छन् ।
भारतको लामो समयदेखिको विश्वासमा जोड दिँदै प्रवक्ता बागचीले द्विपक्षीय सम्बन्धको विकासका लागि सीमा क्षेत्रमा शान्ती कायम गर्न आवश्यक रहेको बताए ।
भारत र चीन दुवै आफ्नो साझा सीमाको तनाव कम गर्न र शान्तिको रक्षाका लागि काम गर्न तयार रहेको चिनियाँ विदेशमन्त्रीको भनाई छ । भारत र चीनबीच पूर्वी लद्दाखमा साढे दुई वर्षदेखि सीमा विवाद चलिरहेको छ । यस्तै, २०२० मा गलवान उपत्यकामा भएको घातक झडपपछि माहोल थप तनावग्रस्त भएको हो ।
भारतका विदेश मन्त्रालयका प्रवक्ताले सीमा क्षेत्रमा शान्ति स्थापना नभएसम्म सम्बन्ध सामान्य हुन नसक्ने भारतको अडान रहेको बताएका छन् । विवादित क्षेत्रमा चीनले निर्माण गरिरहेको पूर्वाधारको बारेमा प्रवक्ताले आफ्नो क्षेत्रको रक्षा भारतले गरिरहेको बताए । उनले भारत र चीनबीच सैन्य र कूटनीतिक माध्यमबाट छलफल भइरहेको बताए । बागचीले दुवै पक्षले सामान्य स्थितिमा फर्किने र सीमामा तनाव कम गर्नेमा ध्यान केन्द्रित भएको बताएका छन् ।
