काठमाडौं– कालीमाटी तरकारी तथा फलफूल बजारमा भित्रिएको तितेकरेलामा अत्यधिक मात्रामा विषादी भेटिएको छ।
कालीमाटी तरकारी तथा फलफूल बजार विकास समितिका अनुसार चितवनबाट बिक्रीका लागि ल्याइएको करेलामा ७५ प्रतिशत मात्रामा अगार्नोफस्फेट नामक विषादी भेटिएको हो ।
आइतबार कालीमाटी तरकारी बजारमा बिक्रीका लागि ल्याइएका १७ वटा तरकारीको विषादी परीक्षण गरिएकोमा तितेकरेलामा उक्त विषादीको मात्रा बढी भएको पाइएको समितिले जनाएको छ । बजारमा कार्वामेट र अर्गानोफस्फेट समूह कीटनाशक विषादीको मात्र परीक्षण गरिँदै आएको छ ।
सरकारले ३५ प्रतिशतभन्दा कम विषादी भएको तरकारीलाई उपभोगयोग्य मानेको छ । ३५ देखि ४५ प्रतिशतसम्मको विषादी पाइएमा केही दिन भण्डारण गरेपछि मात्र उपभोग गर्न सकिने मापदण्ड तोकिएको छ। तर, ४५ प्रतिशतभन्दा बढी विषादी रहेको तरकारी उपभोगका लागि अयोग्य मानिन्छ।
