बागमती। हेटौँडा–काठमाडौँ जोड्ने कान्तिलोक सडकखण्डमा यही वैशाख १८ गतेदेखि जेठ १ गतेसम्म सवारीसाधनको आवागमन बन्द हुने भएको छ।
जिल्ला प्रशासन कार्यालय मकवानपुरले सूचना जारी गरी मकवानपुरको बकैया गाउँपालिकास्थित ठिङ्गन–बगुवा खण्डमा सडक स्तरोन्नतिको काम हुने भएकाले सवारीसाधन आवागमन बन्द गरिएको जनाएको छ।
मकवानपुरका सहायक प्रमुख जिल्ला अधिकारी राजेन्द्रप्रसाद कँडेलका अनुसार वैशाख १८ गतेदेखि जेठ १ गतेसम्म दैनिक बिहान १० बजेदेखि बेलुका ४ बजेसम्म ६ घण्टा सडक बन्द रहनेछ। ठिङ्गन–बगुवा सडकखण्डअन्तर्गत गङ्गटे नजिकैको भर्याङडाँडामा सडक स्तरोन्नति गरिने भएकाले यो निर्णय लिइएको उनले बताए।
सडक बन्द हुने अवधिमा हेटौँडा–काठमाडौँ वा काठमाडौँ–हेटौँडा यात्रा गर्ने यात्रुहरूलाई वैकल्पिक मार्ग प्रयोग गर्न सहायक प्रजिअ कँडेलले आग्रह गरेका छन्।
