राजावादी आन्दोलनका कमाण्डर दुर्गा प्रसाईं यतिबेला फरार छन् । गत शुक्रबार तीनकुनेमा विध्वंश गर्न प्रर्दशनकारी उक्साउने प्रसाईंलाई प्रहरीले पक्राउ गर्न सकेन । लगत्तै उनी फरार भएका थिए । यहीबीच प्रसाईं भागेर झापा पुगेको खुलासा भएको छ । काठमाडौंबाट झापा पुग्न उनले प्रयोग गरेको गाडी पनि बरामद भएको छ भने गाडी धनी र चालक पक्राउ परेका छन् । तर झापाबाट प्रसाईं भने गायब बनेका छन् ।
प्रदशंक चर्किएपछि क्षणभरमै प्रसाई एउटा सटरमा लुकेका थिए र त्यहाँबाट इमाडोलस्थित विवादित धर्मगुरु पुष्कर खतिवडाको घर पुगे । अनि त्यहिबाट हराए र अहिलेसम्म पनि गायब छन् । प्रहरीले तुरुन्तै काठमाडौंका सबै सिमामा उनलाई पक्राउ गर्न प्रहरी परिचालन गर्याे । बारा, पर्सा, चितवन, रौतहट, कपिलवस्तु, झापा र मोरङदेखि नेपालगञ्जसम्मका सीमामा विशेष निगरानी गरियो । तर उनको अहिलेसम्म अत्तोपत्तो लागेको छैन ।
गैरीगाउँमै मोबाइल स्वीच अफ गरेर काठमाडौं छाडेका प्रसाईले शुक्रबार साँझै फेसबुकमा स्ट्याटस लेखे, ‘मलाई पक्राउ गर्न प्रहरी आइरहन पर्दैन, जहाँ बोलाउँछौ, त्यहीँ आउँछु ।’ तर प्रहरीले यसलाई विश्वास गरेन । अगाडी पनि उनले खाएको कसम खेर गएको छ । माँ कसम भाग्दिन भन्दै कसम खाने प्रसाईं गायब बनेका छन् ।
शुक्रबार तीनकुनेमा विध्वशं गरेर भागेका प्रसाईं भक्तपुर, सिन्धुली हुँदै झापासम्म पुगेको खुलासा भएको छ । बीएबी ४२०८ नम्बरको गाडीमा पेरिसडाँडा जाने बाटो हुँदै प्रदर्शनस्थलबाट निस्किएका प्रसाईं त्यहाँबाट झापा पुगेका थिए । त्यसपछि उनी अर्कै गाडी चढेर भारत छिरेको स्रोत बताउँछ । प्रसाईंलाई झापामा छाडेको गाडी चाँहि उदयपुर पुगेर त्यसपछि मोरङको सुन्दरहरैँचा पुगेको थियो । त्यहिबाट प्रहरीले गाडी बरामद गरि गाडीधनी मुकुन्द दाहाल र चालक ईश्वर विक पनि पक्राउ गरेको छ ।
प्रसाई चढेको गाडी दाहालले सुन्दरहरैचामा आफ्नो ससुरालीमा लगेर राखेका थिए । दाहालका अनुसार विकले हाकेँको गाडीमा राखेर प्रसाईंलाई झापाको बिर्तामोडस्थित बीएण्डसी अस्पतालमा छाडिएको थियो । जो प्रसाईंकै अस्पताल हो । स्रोतका अनुसार प्रसाईं भने बीएण्डसीमा केही समय बसेर पूर्वी नाका काँकडभिट्टा हुँदै भारत छिरेका छन् ।
प्रसाईंले प्रहरीलाई आफु यतै छु भन्दै धक्कु लगाउँदै एउटा मन्दिर अगाडी बनाएको भिडियो काँकड्भिट्टा वा नाकापारि पानीट्यांकी वा नक्सलबाडी क्षेत्रमा खिचेको हुनसक्ने आशंका छ । प्रसाईंले भने आफू काठमाडौंकै एक मन्दिरमा रहेको दाबी गरेका थिए । यसरी प्रसाईंले छापामार शैलीमा भिडियो सार्वजनिक गरे पछि सो स्थानको खोजी भइरहेको छ । यस्तै प्रसाईंको खोजीका लागि प्रहरीको विशेष ब्यूरो, केन्द्रीय अनुसन्धान ब्यूरो (सीआईबी), उपत्यका अपराध अनुसन्धान कार्यालय लगायतको टोली परिचालित छ ।
