राजावादीहरुको आन्दोलनले प्रधानमन्त्री केपी शर्मा ओली, प्रमुख प्रतिपक्ष दल माओवादी केन्द्रका अध्यक्ष पुष्पकमल दाहाल, एकीकृत समाजवादीका अध्यक्ष माधव नेपाल र एमालेबाट निष्कासित नेता भीम रावललाई नजिक ल्याएको छ ।
कुनै समय सँगै राजनीतिक सहकार्य गरेका नेताहरु मध्ये प्रधानमन्त्री केपी शर्मा ओली कोहीको नाम नै उच्चाहरण गर्न चाहदैनन् त कोहीको अनुहार पनि हेर्न चाहदैनन् । कतिपय नेताहरुसँग प्रधानमन्त्री ओलीको पानी बाराबारकै सम्बन्ध छ । तर, पछिल्लो समय राजावादीहरुको आन्दोलन चर्किदै गएपछि मुखै हेर्न नचाहने नेताहरुसँग पनि ओली नजिक बनिरहेका छन् ।
साढे तीन वर्ष अघि एमाले पार्टी फुटाएर नेकपा एकीकृत समाजवादी पार्टी गठन गरेका माधव नेपाल र ओलीबीचको सम्बन्ध दुश्मनी मै परिणत भएको थियो । तर, राजावादीहरुले माधव नेपालको पार्टी कार्यलयमा तोडफोड र आगजनी गरेपछि र नेकपा एस निकट कोइराला परिवारका एक मात्र कम्युनिष्ट नेता कमल कोइरालाको निधनमा श्रदान्जली दिन ओली सोमबार नेपालको पार्टी कार्यलय पुगे । ओली पुगेपछि त्यहाँ बेग्लै तरंग मच्चियो ।
नेताहरुले शोक बिस्रिएर शक्ति सम्झिए । त्यसपछि, सामाजिक सञ्जालमा नेताहरुको उत्साह र उमंग देखियो । नेकपा एसकी नेतृ रामकुमारी झाँक्री एक घण्टा अघिदेखि नै ओली आउने सूचना फेसबुकमा पोष्ट गरेकी थिईन् । नेकपा एसको पार्टी कार्यलयमा ओलीको आधा घण्टा जतिको बसाइ पछि एसका उपाध्यक्ष प्रकाश ज्वालाले सामाजिक सञ्जालमा फोटो राख्दै आइस ब्रेक भनेर लेखेका छन् । ओली माधव नेपालको पार्टी कार्यलय आउनुले ओलीले कटुताको भाव छोडेर मित्रताको हात अघि बढाउन चाहेको देखिन्छ ।
एकीकृत समाजवादीको पार्टी कार्यलयमा प्रधानमन्त्री ओलीको आडमै एमालेबाट निष्कासित नेता भीम रावल पनि देखिए । पार्टीका अनुशासन उल्लंघन गरेको आरोपमा तीन महिना अघि एमाले र ओलीको नजरबाट बर्खास्तिमा परेका रावल सोमबार सँगै देखिएका हुन् ।
राजावादीको सक्रियताले त्राहिमाम बन्दा मुखै हेर्न नचाहनेसँग ओलीले हात मिलाउन अघि बढेको संकेत देखाएको छ । त्यतिमात्र होइन, प्रमुख विपक्षी दल नेकपा माओवादी केन्द्रप्रति सधै शब्दका वाणीले हमला गर्ने प्रधानमन्त्री ओली सोमबारको प्रतिनिधिसभाको बैठकमा नरम देखिए ।
उनले माओवादी, एकीकृत समाजवादी सम्मिलत समाजवादी मोर्चाले चैत १५मा गरेको प्रदर्शनको प्रशंसा मात्र गरेनन् माओवादी अध्यक्ष पुष्पकमल दाहाल र एकीकृत समाजवादीका अध्यक्ष माधव नेपाललाई संसदको रोष्ट्रमबाटै धन्यवाद पनि दिए ।
पुष्पकमल दाहाल, माधव नेपाल, भीम रावलसँग सधै आक्रमक देखिने ओली सोमबार शान्त देखिए । अहिलेको संघिय लोकतान्त्रिक गणतन्त्रात्मक व्यवस्थाप्रति प्रश्न उठ्न थालेपछि र राजसंस्था पक्षधरहरु फेरि राजतन्त्र फर्काउन जोडबल गरिरहदा प्रधानमन्त्री केपी शर्मा ओली नामै उच्चाहरण गर्न नचाहने नेताहरुसँग राजनीतिक समझदारीको हात अघि बढाएको देखिन्छ ।
