काठमाडौँ – थाई सेनाले मुलुकको उत्तरी भागमा गरेको कारवाहीमा छ जना संदिग्ध लागूऔषध तस्कर मारिएका छन् । दक्षिणपूर्वी एसियामा लागूऔषधका लागि निकै कुख्यात मानिने गोल्डेन ट्राएंगल नजिकै घटना भएको थाई अधिकारीले जनाएका छन् ।
यस क्षेत्र थाइल्याण्ड म्यान्मार र लाओस सीमामा रहेको छ । यहाँ बारम्बार हुने गरेको सैन्य कारबाहीको बाबजुद लागूऔषध तस्करीका घटनामा भने कमी नआएको बताइन्छ ।
सैनिक अधिकारीहरुले सोमबार बिहान फ्याङ जिल्लामा १५ देखि २० जना मानिसको समूहसँग मुठभेढ भएको बताएका छन् । छवटा सीमावर्ती प्रान्तको अनुगमन गर्ने फा मुआङ टास्क फोर्सले कारबाहीका क्रममा दोहोरो भिडन्तमा परी छ जना तस्कर मारिएका जनाएको छ ।
गत महिना थाई सेनाको कारवाहीमा म्यान्मारको सीमानजिकै १५ जना लागूऔषध तस्कर मारिएका थिए । तस्कर समूहले आक्रमण गरेपछि जवाफमा गोली चलाएको अधिकारीहरूले जानकारी दिएका छन् ।
तस्करहरुसँग क्रिस्टल मेथाम्फेटामाइन नामक लागूऔषध रहेको बताइएको छ । यस उत्तेजक लागूऔषध म्यान्मारमा उत्पादन हुँदै आएको छ । म्यानमारमा उत्पापदन मेथ छिमेकी मुलुकहरु थाइल्याण्ड र लाओस हुँदै एसिया र विश्वभर निर्यातका लागि पठाइन्छ ।
