नवलपरासी पश्चिम । नवलपरासी पश्चिमको पाल्हिनन्दन गाउँपालिका–३, बेलासपुरमा स्थानीय दुई समूहबीच भएको झडप नियन्त्रण गर्न पुगेको प्रहरीको गाडी जलाइएको छ।
लुम्बिनी प्रदेश प्रहरीका एसएसपी जनार्दन जिसी का अनुसार, झडप रोक्न पुगेको प्रहरीको भ्यानमा आगजनी गरिएको छ। “घटनाबारे अनुसन्धान सुरु गरेका छौं,” उनले जानकारी दिए।
झडपमा १५ जना घाइते, थप प्रहरी परिचालन
आज बिहान ९ बजे भएको झडपमा प्रहरी र स्थानीय गरी करिब १५ जना घाइते भएका छन्।
स्थिति नियन्त्रण गर्न रुपन्देहीबाट थप ५० जना प्रहरी खटाइएको जिल्ला प्रहरी कार्यालय, रुपन्देहीका एसपी रञ्जितसिंह राठौर ले जानकारी दिए।
झडपको कारण: तीन महिना पुरानो विवाद
प्रहरीका अनुसार, झडपको जड तीन महिना अगाडिको भागी विवाह हो।
भागी विवाहपछि केटी पक्षले केटाका बुवालाई कुटपिट गरेका थिए।
विवाद समाधान गर्न वडा कार्यालय र जिल्ला प्रहरी कार्यालयमा मिलापत्र गराइएको थियो।
तर, सोमबार राति केटी पक्षका आफन्तले केटाका भाइलाई बाटोमै रोकेर पुनः कुटपिट गरेका थिए।
घाइते युवकको पृथ्वीचन्द्र अस्पताल, परासीमा उपचार भइरहेको छ।
स्थिति तनावग्रस्त, प्रशासनको पहल
यो घटनापछि गाउँलेहरू दुई पक्षमा विभाजित भई कुटपिटमा उत्रिएका थिए।प्रहरीले बल प्रयोग गरी स्थिति नियन्त्रणमा लिएको छ।
हाल प्रमुख जिल्ला अधिकारीसहित स्थानीय निकायका प्रतिनिधिहरू शान्ति कायम गर्न छलफलमा संलग्न छन्।
