कुनै पनि संक्रमण र रोग फैलिन नदिन अस्पतालका शौचालय सबैभन्दा व्यवस्थित हुनुपर्ने मुख्य मध्येको शर्त हो । तर, काठमाडौं उपत्यकाका सरकारी अस्पतालका शौचालयहरु निकै बिजोग अवस्थामा संचालन भइरहेका छन् । शौचालयमा कतै चुक्कुल छैन्, कतै विजुली छैनन्, कतै पानी भरिएका छन् त कतै नाक नछोपी जान सकिन्न ।
कान्ति बाल अस्पतालमा विरामी र कुरुवा गरि दैनिक २ हजार भन्दा बढीको आवतजावत हुन्छ । दैनिक हजारौ मानिसको आवतजावत हुने यो क्षेत्रमा शौच गर्न आउनेहरु नाक छोप्दै शौचालय भित्र जान्छन र त्यसै गरि निस्कन्छन् । यो उनीहरुको बाध्यता हो । अस्पतालको शौचालयमा चुक्कुल, बत्ती छैन र कतै वान्ताको फोहरले भित्र जानै नसकिने अवस्था छ । प्रयोग गर्नै नमिल्ने गरि शौचालय पानीले टम्म भरिएको छ । अस्पतालमा आउने विरामी र विरामी कुरुवाले यस्ता समस्या वर्षौदेखि खेप्दै आएका छन् । तर, यस विषयमा अस्पताल प्रशासन भने अनविज्ञ रहेको बताउँछ ।
देशकै ठूलो र जेठो सरकारी अस्पताल वीरमा पनि यस्तै समस्या छ । यहाँ दैनिक २ हजार ५ सय भन्दा बढी विरामी आउँछन् । तिनका कुरुवा पनि उत्तिकै हुन्छन् । तर, तिनीहरुलाई यो अस्पतालमा शौचालय जानुपर्यो भने लाईनमा बस्नुपर्छ । आपतकालिन अवस्थामा कसरी लाईनमा बस्ने ? लाइनमै बसेर शौचालय गयो श्वास लिनै नसकिने दुर्गन्ध फैलिएको छ । अस्पताल प्रशासनले भने दैनिक सरसफाई गरिएपनि बाटोमा हिड्नेहरु र वरपरका व्यवसायीले समेत अस्पतालकै शौचालय प्रयोग गर्ने हुँदा धेरै भिड र दुर्गन्ध बढेको बताएको छ ।
दुर्गन्धित शौचालय सर्वसाधारणका लागि मात्र हो । त्यहाँका कर्मचारीले भने फार व्यवस्थित छुट्टै शौचालय प्रयोग गर्छन् । आफूले प्रयोग गर्ने शौचालयमा साँचो लगाएर जान्छन् । यो एक उदाहरण मात्रै हो । काठमाडौं उपत्यकाको अन्य थुप्रै सार्वजनिक अस्पतालका शौचालयको अवस्था यस्तै छ ।
