काठमाडौं । अमेरिकी राष्ट्रपति डोनाल्ड ट्रम्पले प्यालेस्टिनीहरूलाई गाजाबाट अन्यत्र सार्ने सुझाबपछि हमासले बिहीबार अरब लिग र इस्लामिक सहयोग सङ्गठन (ओआइसी)लाई आकस्मिक अधिवेशन बोलाउन आह्वान गरेको छ।
एक प्रेस विज्ञप्ति जारी गर्दै हमासका नेता महमुद मर्दावीले अरब क्षेत्र र अन्तर्राष्ट्रिय दुवै स्तरमा समन्वयात्मक कूटनीतिक प्रयासको लागि आह्वान गर्दै उनीहरूको अधिकारलाई कमजोर पार्ने वा उनीहरूलाई आफ्नो भूमिबाट विस्थापित गर्ने उद्देश्य राख्ने कुनै पनि प्रस्तावविरुद्ध संयुक्त प्यालेस्टिनी अडानको आवश्यकतामा जोड दिएको छ ।
उनले प्यालेिस्टनी एकतालाई मजबुत बनाउन र गाजा र प्यालेस्टाइनलाई समग्ररूपमा सामना गर्नका लागि व्यापक रणनीति विकास गर्न एकीकृत मोर्चा गठन गर्न आह्वान गर्दै प्रतिक्रियामा राजनीतिक, कूटनीतिक र व्यावहारिक उपायहरूको समन्वय समावेश हुनुपर्नेमा जोड दिए ।
हमास नेताले ट्रम्पको प्रस्तावलाई ‘नश्लवादी’ योजनाको संज्ञा दिएको छ । उनले प्यालेस्टिनी मुद्दालाई कमजोर पार्ने, अधिकार खोस्ने र आफ्नो मातृभूमिबाट विस्थापित गर्ने उद्देश्यले ल्याइएको योजना ट्रम्पको ‘समाधान नीति’को निरन्तरता भएको बताउँदै यसको कडा रूपमा विरोध गरे ।
