मिन्स्क— बेलारुसका लागि भारतीय राजदूत आलोक रञ्जन झाले बेलारुसका नयाँ विदेशमन्त्री सर्गेई अलेनिकसँग भेटवार्ता गरेका छन् । भेटवार्तामा भारतीय राजदुतले भारतले अध्यक्षता गरिरहेको सांघाई सहयोग संगठन (एससीओ) को बारेमा छलफल गरेका छन् । दुई बीच भएको भेटवार्तामा बेलारूसी—भारत सम्बन्धका सामयिक मुद्दाहरू, साथै सांघाई सहयोग संगठनको ढाँचाको बारेमा छलफल भएको बेलारुसको विदेश मन्त्रालयले एक विज्ञप्तिमा जारी गर्दै उल्लेख गरेको छ ।
दुवै पक्षले बेलारुस र भारतबीच विभिन्न तहमा सहयोग प्रगाढ बनाउन आपसी चासोको पुष्टि गरेका छन्। भारतले सेप्टेम्बर २०२३ सम्म यस संगठनको अध्यक्षता गर्नेछ । यसअघि नोभेम्बरमा साङ्घाई सहयोग संगठनका सदस्य राष्ट्रहरूका सरकार प्रमुखहरूको परिषद्को २१औँ बैठक भिडियो कन्फरेन्स मार्फत सम्पन्न भएको थियो। सदस्य राष्ट्रहरूका प्रमुखहरूले विश्व र क्षेत्रीय विकासका प्रमुख मुद्दाहरूमा आफ्नो विचार आदानप्रदान गरे ।
उक्त बैठकमा एससीओ सदस्य राष्ट्र भित्र व्यापार, आर्थिक, सांस्कृतिक र मानवीय सहयोगलाई सुदृढ गर्न प्राथमिकताका उपायहरूबारे छलफल भएको थियो । यसको साथै उक्त बैठकमा सदस्य राष्ट्रका प्रमुखहरूले २०२२–२०२३ का लागि गणतन्त्र भारतको अध्यक्षताको लागि आफ्नो समर्थन व्यक्त गरे। प्रतिनिधिमण्डलका प्रमुखहरूले आज विश्व द्रुत विकास र व्यापक परिवर्तनको नयाँ युगमा प्रवेश गरिरहेको बताए ।
