काठमाडौं । नेपाली कांग्रेसको भातृ संगठन नेपाल विद्यार्थी संघको अध्यक्ष दुजाङ शेर्पा र समानान्तर गतिविधि गरिरहेकी इतर समुहकी नेतृ प्रेमिका राना मगरबीचको आरोप–प्रत्यारोप छताछुल्ल भइरहेको बेला संघभित्रबाटै दुवैको कार्यशैलीप्रति असन्तुष्टि देखिन थालेको छ ।
नेवि संघका प्रभावशाली केन्द्रिय सदस्य भूपेन्द्रसिं थेबेले एकअर्काविरुद्ध आरोप लगाउँदै अध्यक्ष शेर्पा र विद्यार्थी नेतृ प्रेमिकाले पार्टी अनुशासन समिति गुहार्नु लज्जास्पद भएको बताउँदै आपसी मतभेद र विवाद संघको विधानअनुसार नै समाधन गर्न माग गरेका छन् ।
केही समयअघि कांग्रेसको शेखर कोइराला पक्षधर विद्यार्थी नेतृ प्रेमिकाले अध्यक्ष शेर्पामाथि आर्थिक अनियमितताको आरोप लगाउँदै पार्टीमा उजुरी दिएकी थिइन् भने अध्यक्ष शेर्पाले पनि केन्द्रिय सदस्य प्रेमिकाले संघको विधानविपरीत समानान्तर गतिविधि गरेको, संघको लेटरप्याड दुरुपयोग र आफूमाथि झुट्टा आरोप लगाएको भन्दै छानविन तथा कारवाहीको माग गर्दै पार्टी अनुशासन समितिमा उजुरी गरेका थिए ।
अध्यक्ष शेर्पाले संघको विधानविपरीत खुल्लमखुल्ला समानान्तर गतिविधि गरिरहँदासमेत केन्द्रिय सदस्य प्रेमिकालाई कारवाही नगरी लाचारी प्रर्दशन गरेको र प्रेमिकाले पनि संघको तदर्थ समितिमै बसेर आधिकारिक लेटरप्याड दुरुपयोग गर्दै अपरिपक्वता प्रर्दशन गरेको विद्यार्थी नेता थेबेले आरोप लगाएका छन् ।
विद्यार्थी नेताद्धयको आन्तरिक कलहले फागुनमा हुने स्वतन्त्र विद्यार्थी युनियनको चुनावका नकरात्मक असर पार्न सक्ने र २०८१ चैत्रमा हुने भनिएको नेविसंघको १२ महाधिवेशनसमेत अन्योलमा परेको केन्द्रिय सदस्य थेबेको दावी छ । उनले संघभित्रको आपसी विवादलाई आन्तरिक रुपमै समाधान गरेर निर्धािरत समयमै लोकतान्त्रिक ढंगले महाधिवेशन सम्पन्न गर्न समेत माग गरेका छन् ।
