सत्ताबिहीन बनेका नेकपा (माओवादी केन्द्र)का अध्यक्ष पुष्पकमल दाहाल पानी विनाको माछो जस्तै छट्पटाउन थालेका छन् । पहिलो र दोस्रो ठूलो दल नेपाली काँग्रेस र नेकपा एमालेलाई रिंग्याएर डेढ वर्ष सम्म प्रधानमन्त्री बन्न सफल दाहाल तीनै दुई पार्टीबाट गलहत्याईएका थिए । तर सत्ताबाट बाहिरिएको केही महिना देखि नै उनि ३२ सीटे म्याजिक नम्बर जप्न थालेका छन् । यतिसम्मकी उनि सार्वजनिक कार्यक्रममै ३२ सीटको म्याजिकले कांग्रेस–एमालेको सत्ता उल्ट्याउने दाबी गर्दै हिड्न थालेका छन् ।
प्रचण्डको यही म्याजिकले आजित भएका कांग्रेस–एमालेले असार १७ गते दाहालविरुद्ध गठजोड गरे । त्यसपछि असार ३० गते कांग्रेसको समर्थनमा एमाले अध्यक्ष केपी शर्मा ओली प्रधानमन्त्री बन्न पुगे । ओली प्रधानमन्त्री बनेको ६ महिना मात्रै भएको छ । पटक–पटक प्रचण्डबाटै धोका पाएपछि २०८४ को चुनावसम्मै सत्ता समीकरण टिकाउने समझदारीमा कांग्रेस–एमाले अगाडि बढेका छन् । ७ बुँदे सहमतिमा २ वर्ष ओलीले र त्यसपछि डेढ वर्ष चुनावी सरकारको नेतृत्व कांग्रेस सभापति शेरबहादुर देउवाले गर्ने समझदारी छ । तर, दाहालले सरकारका विषयमा तारन्तार विरोधाभाषपूर्ण अभिव्यक्ति दिन थालेका छन् ।
दाहालले पटक पटक सरकार ढल्ने, गठबन्धन टुट्ने जस्ता अभिव्यक्ति दिईरहँदा उनीबाट पटक–पटक धोका पाएका कांग्रेस–एमाले झन् नजिक भइरहेको भान हुन्छ । प्रधानमन्त्री केपी शर्मा ओलीले २ वर्ष पुग्नुभन्दा एक हप्ता अगाडि नै सत्ता हस्तान्तरण गर्ने पटक–पटक बताएका छन् । कांग्रेस सभापति शेरबहादुर देउवाले पनि ओलीलाई कुनै अप्ठ्यारो नपार्ने गरी सत्ता प्राप्तिका लागि २० महिना कुर्ने संकेत दिइसकेका छन् । यसअघि जस्तो कसैले पनि नखेलोस भनेर प्रचण्ड र देउवा दुवैले सरकारलाई समेत निर्देश गर्ने गरी शीर्ष नेताको संयन्त्र बनाएका छन् । यो संयन्त्रको कुनै ठूलो भूमिका निर्धारण गरिएको छैन । तर, सत्ता सहयात्रामा खटपट आउन खोजे तत्काल शीर्ष नेता बसेर यसलाई मिलाउने अभिभारा संयन्त्रलाई दिइएको छ ।
संसदीय राजनीतिमा कुनै पनि बेला सरकार ढल्ने र बन्ने स्थिति हुने भए पनि नेपालमा गठबन्धन राजनीतिको जग र अभ्यास नै कमजोर रहेको विश्लेषकहरु बताउँछन् । यतिसम्मकी दाहालले संसद् विघटन हुनसक्छ भनेर पनि बोलिरहेका छन् । यसबाहेक उनले ओलीले चिनियाँ कार्ड खेलेको भनेर पनि अभिव्यक्ति दिए । ओलीले चिनियाँ कार्ड खेलेको दाबी गर्ने दाहालले पहिलोपटक प्रधानमन्त्री हुँदा २०६५ मा पहिलो भ्रमण चीनबाट गरेका थिए । कांग्रेससँग मिलेर २०७९ को चुनाव लडेका दाहालले पुस १० गते एमालेसँग मिलेर सरकार बनाएका थिए । तर, एमालेसँग सरकार बनाएकै बेला कांग्रेसको पनि विश्वासको मत लिए । अनि राष्ट्रपति कांग्रेसलाई दिनेगरी सहमति गरे ।
तत्कालै कांग्रेसलाई सरकारमा पनि ल्याए । कांग्रेस सभापति शेरबहादुर देउवासँग आलोपालो प्रधानमन्त्री बन्ने समझदारी पनि गरे । तर, देउवालाई सत्ता हस्तान्तरण गर्नुअगाडि नै प्रचण्डले कांग्रेससँग निहुँ खोजे । कांग्रेसले प्रचण्डलाई नै निरन्तर प्रधानमन्त्री बनाउन चाहेको पनि थियो । तर, २०८० फागुन तेस्रो साता कांग्रेसलाई सरकारबाट धकेलेर दाहालले एमालेलाई भित्र्याए । एमालेसँगको समीकरण पनि लामो समय लान सकेनन् । एमालेसँग सत्तामा हुँदा दाहालले फेरि कांग्रेससँग समीकरणको कुरा गरेको एमाले नेताहरु बताउँछन् । आलोपालो धोका पाएको समान बुझाइले कांग्रेस–एमाले नजिकिएका हुन् । दाहालसँग पटक–पटक धोका पाएका दुई ठूला दल एक हुँदा अहिले प्रचण्डको म्याकिज नम्बर भने बेकामे जस्तै बनेको छ ।
