काठमाडौ । बाराको ऐतिहासिक गढीमाई मेलाको आज एक कार्यक्रमविच उदघाटन हुँदैछ । उपराष्ट्रपति रामसहाय यादवले मेलाको उदघाटन गर्ने कार्यक्रम रहेको छ । मंसिर १ गतेदेखि शुरु भएको मेलाको औपचारिक उदघाटन आज हुने भएको हो ।
गढीमाई मन्दिरका मुख्य पूजारी मंगल चौधरीका अनुसार मंसिर १ देखि शुरु भएको मेला आगामी ३० गतेसम्म चल्ने छ । मंसिर २३ गते मुख्य पूजारीका परिवारजनबाट शुरु हुने तान्त्रिक विधिद्वारा पञ्चबली चढाउने परम्परा रहेको छ । सो दिन धामी झाक्रीहरूद्वारा गरिने पूजा र भक्तजनहरूले चढाउने बलिको व्यवस्थापन गरिनेछ । मेलामा देश तथा विदेशबाट लाखौं दर्शनार्थीहरू गढीमाई माताको दर्शन गर्न पुग्ने गर्दछन ।
प्रत्येक पाँच वर्षमा लाग्ने मेलामा नेपालसहित छिमेकी भारतबाट पनि लाखौँ श्रद्धालु गढीमाई आउने गर्छन् । महागढीमाई नगरपालिका– १ बरियारपुरमा पर्ने यो तुलजा भवानीका रूपमा समेत पुजिने गढीमाई मन्दिर विशेष गरी बलिका कारण सधैँ चर्चामा रहने गरेको छ । भाकल पूरा भएमा त्यसैअनुसार श्रद्धालुले बलि दिने गर्छन् । हजारौँको संख्यामा पशुबलि दिइने यस मन्दिरमा तान्त्रिकले रगत चढाएपछि बलि प्रदान सुरु हुन्छ ।
मन्दिरमा राँगा, बोकाजस्ता जनावरको बलि दिइने गरिन्छ । स्थानीयका अनुसार हजारौँ वर्ष पहिले हत्या कसुरमा जेल सजाय भोगिरहेका एक व्यक्तिको सपनामा देवीले दर्शन दिएकी थिइन् । मकवानपुरगढीकी तुलजा भवानी अर्थात् गढीमाईले सपनामा आफूलाई आफ्नो गाउँमा लैजान भनेकी थिइन् । यसो गरेमा जेलजीवनबाट मुक्त हुनेसमेत उनले बताएकी लोकोक्ति छ ।
जसपछि जेलमा रहेका भगवानदास चौधरी कैदमुक्त भएको र दुःख तथा समस्या समाप्त भएको मान्यता स्थानीयको छ । गढीमाईले दिएको त्रिशूल चौधरीले बरियारपुरमा ल्याएर गाडेपछि पूजापाठ सुरु भएको र मन्दिर बनाइएको विश्वास गरिन्छ ।
