आज स्थानीय तहको उपनिर्वाचन हुँदैछ। ४१ पदका लागि हुन लागेको उपनिर्वाचनमा बिहान ७ देखि अपराह्न ५ बजेसम्मका लागि मतदानको समय तोकिएको छ।
नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि उपनिर्वाचन हुन लागेको हो।
उपनिर्वाचनमा विभिन्न २० राजनीतिक दल र स्वतन्त्र गरी तीन सय ७६ उम्मेदवार प्रतिस्पर्धामा छन्। निर्वाचन हुने वडामा मतदाता नामावलीमा आफ्नो नाम समावेश भएको मतदान केन्द्रमा उपस्थित भई रोजेको उम्मेदवारको निर्वाचन चिह्नमा निर्धक्क भई मतदान गर्न आयोगले आग्रह गरेको छ।
निर्वाचन आयोगका अनुसार मतदाता नामावलीमा नाम समावेश भएकाहरुले मतदाता परिचयपत्र, नेपाली नागरिकताको प्रमाणपत्र, राष्ट्रिय परिचयपत्र, राहदानी, स्थायी लेखा नम्बर परिचयपत्र वा सवारी चालक अनुमतिपत्रको सक्कल प्रमाणका आधारमा मतदान गर्न पाउनेछन्।
साँझ छ बजेसम्म मतदान सकिएपछि मतपेटिकाहरू आजै मतगणना क्षेत्रमा संकलन गरिनेछ। र सम्भव भएसम्म आजैबाट नभएको भोलि बिहानदेखि मतगणना सुरू गरिने आयोगले जनाएको छ।
आयोगले मतगणना समय समयको मतपरिणाम आफ्नो वेबसाइटबाट पनि जानकारी गराउने जनाएको छ।
