काठमाडौँ : अन्तरराष्ट्रिय बजारमा नेपाली चिया र कफीको माग बढ्दै गएको छ।
चिया तथा कफी विकास बोर्डको तथ्याङ्कअनुसार आव ०७९/८० मा ७७ मेट कफी विदेशमा निर्यात गरिएको थियो भने आव ०७८/७९मा ७२ मेट उत्पादन गरी ९ करोड ६० लाख रुपैयाँको निर्यात गरिएको थियो। बोर्डले आव ०८०/८१ को विस्तृत तथ्याङ्क सङ्कलन भइरहेको जनाएको छ।
आव ०७८/७९मा देशभर ४५० मेट कफीको आयात गरी ३२ करोड खर्च गरिएकामा आव ०७९/८० मा १० करोड रुपैयाँको मात्र आयात गरिएको थियो।
यो करिब २२ करोड रुपैयाँले आयात घटेको बोर्डका निर्देशक दिपक खनालले जानकारी दिए। उनले कफीका लागि उपयुक्त हावापानी र क्षेत्र विस्तारले उत्पादनमा पनि वृद्धि भएको बताए।
हाल देशभर ३ हजार ६५९ हेक्टर जमिनमा कफीखेती विस्तार गरी करिब ३९५ मेट्रिक टन ‘ग्रिनविन’ उत्पादन गरिएको छ।
यस क्षेत्रमा कार्यरत कृषकको सङ्ख्या हाल ३३ हजार छ भने नेपाली कफीको अन्तरराष्ट्रिय बजारमा माग करिब १४ हजार मेट्रिकटन रहेको बोर्डले जनाएको छ।
नेपालमा गुल्मी, पाल्पा, अर्घाखाँची, ललितपुर, तनहुँ, काभ्रे, सिन्धुपाल्चोक, लमजुङ, कास्की, गोर्खा, स्याङ्जा, पर्वत, बागलुङलगायत ४३ जिल्लामा यसको व्यावसायिक खेती हुँदै आएको जनाइएको छ।
आव ०७८/७९मा देशभर चियाको निर्यात ३ अर्ब ८० करोड रुपैयाँ रहेकामा आव ०७९/८० मा करिब १४ करोडले वृद्धि भएको छ।
चिया उद्योगको सङ्ख्या १६१ पुगेको छ। यस क्षेत्रमा करिब ६० हजार श्रमिक कार्यरत रहेको बोर्डका अधिकृत चन्द्र पुरीले जानकारी दिए।
