पोखरा, १४ पुस । पोखरामा शुरु २२ औँ आहारारा पोखरा गोल्डकपमा धरान फुटबल क्लबले बिजयी शुरुवात गरेको छ । पोखरा रंगशालामा बिहीबारदेखि शुरु खेलमा धरानले आयोजक साहारालाई १–० ले पराजित गरेको हो । खेलको चौथो मिनेटमा धरान फुटबल क्लबले पाएको फ्रिकिक अवसर नै गोलमा परिणत भएपछि धरानले सहारा क्लबमाथि ऐतिहासिक जित दर्ता गर्यो ।
१२ वर्षपछि पोखरा रंगशालामा यी दुईको भेट हुदाँ पूर्वेली क्लब धरानले सहारामाथि यसअघिका दुई हारको श्रृखंलाको समेत अन्त्य गरेको छपहिलो हाफको चौथो मिनेटमा नै पाएको फ्रि किकलाई धरानका प्रकाश बुढाथोकीले गोल गर्दै साहारा विरुद्ध १–० को अग्रता लिन सफल बने । जुन गोल नै धरानलाई जीत हात पार्न निर्णायक बन्यो ।
पोखराको मैदानमा सहारा र धरान बीच तेस्रो पटक उदघाटन भिडन्त थियो । २०६८ सालमा धरान र सहारा क्लब उदघाटनका प्रतिस्पर्धी बनेका थिए । दोस्रो हाफमा आयोजक साहाराले केही अवसर पाएको भएपनि नतिजा निकाल्न भने सकेन । गोल्डकपको दोस्रो दिन पुस १७ गते शुक्रबार नेपाल पुलिस क्लब र चर्च ब्वाईज बीच प्रतिस्पर्धा हुने छ ।
सहारा क्लबको आयोजना तथा हिमश्री फुड्स प्रालिको उत्पादन आहा रारा चाउचाउको मुख्य प्रायोजन रहेको गोल्डकपको उदघाटन पोखरा महानगरपालिका प्रमुख धनराज आचार्यले गरे । उनले पोखरा अन्तराष्ट्रिय विमानस्थल सञ्चालनसँगै साँझमा पनि विमान अवतरण हुने भन्दै साँझकै समयमा फुटबल खेलाउने तर्फ आवश्यक सहयोग महानगरपालिकाले गर्ने प्रतिबद्धता जनाए । ‘स्पोर्टस टुरिज्म आजको आश्यकता हो ’ महानगरप्रमुख आचार्यले भने–‘त्यसको लागि महानगरको साथ रहने छ ।’
प्रतियोगिता उदघाटन समारोहमै वर्ष उत्कृृष्ठ फुटबलरबाट नेपाली राष्ट्रिय फुटबल टोलीका डिफेण्डर अनन्त तामाङलाई सम्मानित गरिएको थियो । उनलाई नगद ५० हजार राशिसहित दोसल्ला ओढाई सम्मान गरियो । गोल्ड कपमा विजेता टिमले १२ लाख रुपैयाँ र उपविजेताले ६ लाख रुपैयाँ प्राप्त गर्ने छन् । उत्कृष्ट खेलाडीलाई इलेक्ट्रिक स्कुटर प्रदान गरिने छ ।
