काठमाडौं – सशस्त्र प्रहरी बल, नेपालका महानिरीक्षक राजु अर्यालले सकलदर्जाका कर्मचारीको हितमा काम गर्ने बताउँदै संगठन प्रमुखको जिम्मेवारी सम्हालिरहे पनि उनकै कार्यकालमा तल्लो दर्जाका कर्मचारीले पाउँदै आएको सुविधा कटौती भएको छ।
सशस्त्र प्रहरीका अधिकृत तथा जवानले यसअघि पाउँदै आएको प्रारम्भिक पोसाक तथा सामानमा ठूलो कटौती भएको हो। गृह मन्त्रालयले सशस्त्र प्रहरी नियमावली, २०७२ को अनुसूची–१५ संशोधन गरेको हो। यसबारेको सूचना पुस ११ गतेको राजपत्रमा प्रकाशित छ।
नयाँ संशोधित नियमवालीअनुसार अब विगतमा सशस्त्र प्रहरीले १ वर्षका लागि २र२ जोर पाउँदै आएको पीटी गञ्जी तथा पीटी कट्टु १ वर्षका लागि १र१ जोर मात्रै पाउने भएका छन्। यो अनुसूची–१५ को खण्ड ९क० को क्रमसंख्या ९ मा गरिएको संशोधन हो।
यस्तै ऊनीको कम्बल २ वर्षका लागि २ वटा पाउँदै आएकोमा अब २ वर्षका लागि १ वटा कम्बल दिइने भएको छ। खण्ड (क) को क्रमसंख्या १४ मा हेरफेर गर्दै यस्तो व्यवस्था गरिएको हो।
टप बुट भने सशस्त्र प्रहरी अधिकृतले पनि पाउने भएका छन्। खण्ड (क) को क्रमसंख्या २५ को ‘सिनियर’ शब्द झिकिएको हो। यसअघि सो बुट सिनियर अधिकृतले मात्र पाउँदै आएका थिए।
खण्ड ९क० को क्रमसंख्या २९ हेरफेर गर्दै गरम र जाडो महिनाको सेरेमोनियल सेट राजपत्रांकित अधिकृतसँगै सेरेमोनियल कार्यक्रममा भाग लिने अन्य सशस्त्र प्रहरी कर्मचारीहरूलाई पनि प्रदान गर्ने व्यवस्था गरिएको छ। यसअघि सेरेमोनियल सेट राजपत्रांकित अधिकृतले मात्र पाउँथे।
त्यस्तै यसअघि स्नो पार्क ज्याकेट ५ वर्षका लागि १ थान दिइँदै आएकोमा अब समान अवधिका लागि स्नो पार्क वा डाउन ज्याकेट दिइने भएको छ। खण्ड (घ) को क्रमसंख्या ४ मा यस्तो संशोधन गरिएको हो। ३ वर्षका लागि १ जोर दिइँदै आएको कटन प्याडेट युनिफर्म सुटको सट्टा अब २ वर्षका लागि १ जोर हिमाली चुस्ता दिइने भएको छ। खण्ड (घ) को क्रमसंख्या ६ मा यस्तो हेरफेर गरिएको हो।
खण्ड (ङ) यथावत् राखेर खण्ड (च) भने झिकिएको छ। खण्ड (च) झिकिएपछि सशस्त्र प्रहरी परिचरको लागि दिइने सामान तथा पोसाकमा ठूलो कटौती भएको छ। अनुसूची संशोधनपछि भएको यो नै सबैभन्दा ठूलो कटौती हो।
खण्ड (छ) को क्रमसंख्या (२) को सिम्बोल नम्बर १ पछि सिम्बोल नम्बर ‘१क’ थपिएको छ। यसअन्तर्गत सबै स्वास्थ्य प्राविधिकलाई १ वर्षमा १ थान सेतो टेरिकन स्क्रब प्रदान गरिने छ।
यसैगरी अब अनुसूची–१५ मा उल्लिखित संस्थागत रूपमा प्रयोग हुने सामानहरूको खर्च भएर जाने र खर्च भएर नजाने स्पष्ट रूपमा वर्गीकरण गरी अभिलेख तयार पारी कार्यालयले हस्तान्तरण गर्ने गरी व्यस्थापन गरिने भएको छ। १ वर्षभन्दा बढी अवधिसम्म प्रयोग गर्न सकिने खर्च भएर जाने व्यक्तिगत सामानहरू पुनः प्रयोग गरिने भएको छ। खण्ड (छ) पछि यस्तो ‘द्रष्टव्य’ थपिएको हो।
