धिरज पौडेल
काठमाडौं – नेपाली कांग्रेसको विधान अनुसार अबको माहाधिवेशनमा नेपाली काँग्रेसका पार्टी सभापति शेरबहादुर पुनः उम्मेदवार हुन पाउने छैनन् । सभापति देउवा विधानतः वाहिरीने भएपछि कांग्रेसमा १५ औ महाधिवेशनको चर्चा सुरु भैसकेको छ । संसदको सवैभन्दा ठूलो दल नेपाली कांग्रेसको नेतृत्वका लागि आकांक्षीको लाइन समेत लामै छ ।
कोइराला परिवारका शशांक कोइराला र शेखर कोइराला समेत नेतृत्वका आकाक्षी हुन । बीपी पुत्र शशांक कोइराला १५औं महाधिवेशनको तयारीमा जुटिसकेका छन । त्यसो त अन्य आकाक्षीहरुले समेत तयारी थालेका छन । यसअघि दुवैपटक कुनै समूहमा स्पष्ट नखुलेका शशांक कोइराला १५औं महाधिवेशनमा भने आफैं अघि सर्ने तयारीमा छन् ।
नेपाली कांग्रेसको १३औं महाधिवेशनमा आफ्नो समूहका नेता रामचन्द्र पौडेल सभापतिमा हार्दा शशांकले सहजै महामन्त्री जितेका थिए । १४औं मा परिवारभित्रैका डा. शेखर कोइराला सभापतिमा उठे पनि शशांकले खुलेर समर्थन गरेनन् । त्यसअघि रामचन्द्रलाई पनि उनले खुलेर समर्थन गरेका थिएनन् । १५औं महाधिवेशनमा शेरबहादुर देउवा नदोहोरिने भएपछि शशांकले सभापतिमा आँखा लगाएका हुन् । यसका लागि शशांकले छलफलसमेत चलाएका छन ।
तत्काल कांग्रेसमा युवा नेता आए अहिले राजनीति गरिरहेका नेताको भविष्य समाप्त हुन्छ भन्ने साझा बुझाइ छ । कांग्रेसको नेतृत्वमा युवा आए अहिले राजनीति गरिरहेका पूराना नेताको भविष्य समाप्त हुन्छ भन्ने साझा बुझाइ छ । युवा पुस्तामा नेतृत्व जान नदिने कार्ड फ्ँयाकेर शशांकले पूराना नेताको समूहको नेतृत्व गर्ने तयारी गरेको देखिन्छ । शशांकबाहेक प्रकाशमान र विमलेन्द्र निधि १४औं महाधिवेशनमा सभापतिको उम्मेदवार बनिसकेका छन् ।
देउवासँगै प्रतिस्पर्धा गरे पनि दोस्रो चरणमा सिंह र निधिले दुवैले उनैलाई समर्थन गरेका थिए । जसको कारण शेखर कोइराला पराजित हुन पुगेका थिए । सभापति देउवापछिको सर्वमान्य नेता नहुँदा दाबेदार सबैलाई उनले आफैंलाई सहयोग गर्छन भन्ने सवैजसो नेताको वुझाई देखिन्छ ।
देउवाको समेत समर्थन लिने कुरामा कसले बाजी मार्छ त्यो भने समयलेनै देखाउने छ । नेपाली कांग्रेसमा महाधिवेशन नजिकिदै जादा पार्टीको नेतृत्वको बहसले सधैजसो स्थान पाएको छ । तर महाधिवेशनको समय नजिकिदै जादा कांग्रेसमा नेतृत्वको बहस बढी हुने गरेको छ जसले नीति ओझेलमा पार्ने गरेको छ । पार्टी नेतृत्वमा बुढापाकाको वर्चश्व भयो, अब युवा पुस्ता नेतृत्व आउनुपर्छ भन्ने बहस पनि नेपाली कांग्रेसमा लामो समयदेखि चल्दै आएको छ ।
पदाधिकारीहरुमा युवाहरु समेत आएको भएपनि युवा नेतृत्वको बहस, बहसमै सिमिति हुने गरेको छ । अन्तिमसम्म पुग्दा यस्तो बहस बरालिने र उही पुरानै नतिजाले निरन्तरता पाउँने गरेको छ ।
अन्तिममा महाधिवेशनबाट कम्तीमा ७० वर्ष कटेका पाका नेताहरूले नै नेतृत्व पाउने हुँदै आएको छ । अहिले केहि युवाहरुको समेत आगामी महाधिवेशनबाट नेतृत्वका लागि चर्चा हुँदै आएको छ । यद्यपी आसन्न महाधिवेशनबाट पनि भाइ र युवा होइन, फेरिपनि दाइहरू नै निर्वाचित भएर आउने सम्भावना बलियो देखिन्छ । यसमा शशांक शेखर लगाएतकै पुरानो पुस्ताका नेताहरु हावी हुने कांग्रेसवृत्तमै चर्चा छ ।
