१. सफलता प्राप्त गर्नका लागि कठोर सतत् प्रयत्न र दृढ इच्छा राख । प्रयत्नशील व्यक्ति भन्दछ ‘म समुद्र पिउँछु, मेरो इच्छाले पर्वतको टुक्राटाक्रा हुनेछ ।’ यस प्रकारको शक्ति र इच्छा राख । कठोर परिश्रम गर, तिमीले आफ्नो उद्देश्यलाई निश्चय नै प्राप्त गर्नेछौ । यो प्रमाणित सच्चाई हो । शक्ति नै जीवन कमजोरी नै मृत्यु हो । शक्ति परम सुख हो, अजर–अमर जीवन हो । कमजोरी कहिल्यै नछुट्ने बोझ र यन्त्रणा हो । यसर्थ कमजोरी नै मृत्यु हो ।
२. के तिमी पर्वतकाय बाधाहरुलाई नाघेर काम गर्न तत्पर छौ ? यदि पूरै संसार हातमा नाङ्गो तरबार लिएर तिम्रा विरुद्ध डटोस् तापनि के तिमी आफूले सत्य ठानेको काम गर्ने साहस गर्नेछौ ? यदि तिम्रा पत्नी–पुत्र तिम्रो प्रतिकूल बनून्, भाग्यलक्ष्मी तिमीसँग रिसाएर जाऊन्, नाम यशले पनि तिम्रो साथ छोडिदियोस् तापनि के तिमी त्यस सत्यसँग डगमगाउँदैनौ ? यति हुँदा पनि के तिमी आफ्नो लक्ष्यतर्फ सतत् अघि बढिरहने छौ, हैन त ?
३. हामीले आफूभित्र आशावादी प्रवृत्ति पैदा गर्नु पर्नेछ र प्रत्येक वस्तुमा निहित शुभ पक्ष नै देख्न प्रयत्न गर्नुपर्नेछ । हामी यदि घुँडामा टाउको टेकेर आफ्नो शारीरिक र मानसिक अपूर्णतामा रोइरहने हो भने त त्यसबाट के हुन्छ ? वास्तवमा विपरित परिस्थितिलाई दमन गर्ने जुन वीरतापूर्ण प्रयत्न हो त्यो एकमात्र यस्तो तत्व हो, जसले हाम्रो आत्मालाई उचाईमा उठाउँछ ।
४. अग्लो ठाउँमा उभिएर, हातमा दुई पैसा छोपेर यस्तो नभन्नू— ‘ए माग्ने ! यो ला’ । बरु कृतज्ञ बन कि त्यस विचरो गरिब त्यहाँ रहेछ जसलाई दान दिएर तिमीले आफ्नै सहायता गर्ने अवसर पाउँछौ । सौभाग्य दान पाउने वालाको होइन बरु दान दिनेवालाको हो ।
५. जुन दिव्य शक्तिको प्रथम स्पर्शले नै सम्पूर्ण विश्वमा सर्वत्र महातरंग उठ्न थालेका छन्, त्यसको पूर्ण अभिव्यक्तिको थोरै कल्याणमयी कल्पना, आफ्नो मस्तिष्कमा गर र व्यर्थ संदेह–दुर्बलता ईष्र्या द्वेषको परित्याग गर र यस महायुग चक्र प्रवर्तनमा सहायक बन ।
६. संसारमा थोरै मानिसहरु वास्तवमा भलाई गर्न चाहन्छन् । बाँकी मानिसहरु हेर्छन् तालि बजाउँछन् र आफूले धेरै गरेको सम्झिन्छन् ।
साभारः ‘महापुरुषहरुका अमर वाणी’ पुस्तकबाट
