व्यक्तिगत सफाईको अभावमा बच्चाहरुमा ज्यादा देखिने यो रोग सबै उमेरका व्यक्तिहरुमा देखिन सम्भावना रहन्छ । आउँ ठूलो आन्द्राको रोग हो । यो समस्या हुँदा गन्हाउने पखालामा रगत र फिँज जाने गर्दछ । एमेविक र बेसीलरी गरी आउँ दुई प्रकारको हुन्छ । एमेविकको तुलनामा बेसीलरी खतरनाक मानिन्छ तर उपचारपछि ठीक हुन्छ ।
जीवाणुहरुको संक्रमणको कारणले यो रोग लाग्ने गर्दछ । गलत खानपान, पुरानो कब्जियत आदिको कारण ठोलो आन्द्रामा घाउ हुन्छ र त्यसैको संक्रमणको कारण यो समस्या देखिने गर्दछ भने चिल्लो, तारेभुटेको, मासु यसका परिकारहरुको ज्यादा सेवन पनि आउँको कारण बन्ने गर्दछ ।
समयमै उपचार नगरिएको खण्डमा यसले गम्भिर समस्या निम्त्याउने गर्दछ । तसर्थ बेलैमा यसको उपचार गराउनुपर्दछ । यसको उपचारको निम्ति केही घरेलु विधिहरु—
– पेट दुखेको छ भने तातो पानीको ब्यागले सेक्न सकिन्छ ।
– यो समस्या हुँदा दिनमा उकपल्ट तातो पानीमा खुट्टा डुबाउनु फाइदाजनक मानिन्छ ।
– यो समस्या हुँदा पूर्ण रुपमा विश्राम गर्नुपर्दछ ।
– आउँ लागेको समयमा पेटले कुनै खाना पचाउन र ग्रहण गर्न सक्दैन । त्यसैले यो समयमा सादा पानी र कागती पानी मात्र पिउन वेश हुन्छ । साथै सुन्तलाको जुस पनि पिउन सकिन्छ ।
– केही दिनपछि फलफूल र सलादहरु खान शुरु गर्न सकिन्छ ।
– अनारको जुस यो समस्यामा ज्यादै उपयोगी मानिन्छ ।
– काँचो बेललाई आगोमा पोलेर त्यसको गुदीलाई पानीमा मिसाएर पिउनाले पनि यो समस्यामा लाभ गर्दछ ।
– मेथीको साग दैनिक खानु राम्रो मानिन्छ ।
– चिया, कफी, मैदा आदि खान बन्द गर्नुपर्दछ ।
– पदमचाल, राजवृक्ष, सिस्नो, टिमुर, सेन्ट जोन वर्थ जस्ता जडिबुटीको सेवनले यो रोग निको पार्न सकिन्छ ।
साभारः ‘एकसे एक उपचार’ पुस्तकबाट
