काठमाडौँ । बलिउड अभिनेता शाहरुख खान र दीपिका पादुकोण अभिनित फिल्म ‘पठान’ को गीत ‘बेशरम रंग’ रिलिज भएदेखि नै विवादमा परेको छ । गीतमा केसर रंगको बिकिनी लगाएकी दीपिका पादुकोणमाथि धार्मिक भावनामा चोट पुर्याएको आरोप लागेको छ ।
यसै विवादका कारण फिल्म ‘पठान’ को गीत ‘बेशरम रंग’ यतिबेला चर्चामा छ । वास्तवमा शाहरुख खान र दीपिका पादुकोणमा खिचिएको यस गीतमा अभिनेत्रीको कपडाको रंगले सामाजिक सञ्जालमा बहस मच्चाएको छ । दीपिकाको केसर रंगको बिकिनीमा प्रश्न उठाउँदै धेरैले फिल्म बहिष्कार गर्ने घोषणा गरेका छन् ।
यो गीतलाई लिएर भारतको हिन्दू महासभाले कडा प्रतिक्रिया दिएको छ । दीपिका पादुकोणको बिकिनीको रंगमा महासभाले आपत्ति जनाएको छ । त्यस्तै विश्व हिन्दू परिषदले यस्तो फिल्मलाई हिन्दू समाजले कहिल्यै स्वीकार नगर्ने बताएको छ ।
विश्व हिन्दू परिषदले हिन्दू समाजमा यस्ता फिल्मलाई कदापि मान्य नहुने बताएको छ । यति मात्र होइन, परिषदले यो गीत सम्पादन गर्न निर्देशन दिदै गीतबाट दीपिकाको केसर रंगको पहिरन हटाउनुपर्ने र केही दृश्यहरू पनि काटिनुपर्ने बताएको छ । विश्व हिन्दू परिषद्का प्रवक्ता विनोद बन्सलले आफ्नो विज्ञप्तिमा केसरलाई निर्लज्ज र बेतुका र आपत्तिजनक प्रकारको गतिविधि गरेको भन्दै हिन्दू विरोधी मानसिकता प्रदर्शन गरिएको उल्लेख गरेका छन् ।
गीतको विवाद बारेमा कुरा गर्दै संगीतकार विशाल ददलानी र विशाल शेखरले बेशरम रंग फरक किसिमको गीत भएको बताउदै यो धेरै विधाहरूको फ्यूजन भएको र यसले संगीतको रूपमा धेरै रोमाञ्चक बनाउने प्रतिक्रिया दिएका छन् । उनीहरुले यस गीतलाई आधुनिक बिटसँग संयुक्त रुपमा एक पुरानो स्कूल धुन भएको बताएका छन् ।
बेशरम रंग गीतमा विशाल ददलानी, शेखर रावजियानी, शिल्पा रावले स्वर दिएका छन् । गीतमा स्पेनिस भाषामा पनि केही अंश पनि छन्, जसलाई कारालिसाले गाएकी छन् । यी गीतको विवादपछि सोसल मिडियामा पठान फिल्मको बहिष्कारको अपील उठ्न थालेको छ । यो विषय दिन प्रतिदिन बढ्दै गएको छ ।
शाहरुख खान ४ वर्षपछि ‘पठान’ मार्फत ठूलो पर्दामा फर्कने तयारी गरेका बेला विवादमा परेका छन् । यसअघि उनी ‘जिरो’ मा देखिएका थिए । आनन्द एल राई निर्देशित फिल्म बक्स अफिसमा फ्लप भएको थियो । यो फिल्मपछि शाहरुखले आफूलाई फिल्मबाट टाढा राखेका थिए । अब लामो समयपछि शाहरुख सन् २०२३ मा तीनवटा फिल्ममा देखिदैछन् । ‘पठान’ बाहेक उनी ‘जवान’ र ‘डांकी’ मा पनि काम गरिरहेका । उनका तीनवटै चलचित्रको दर्शकले आतुरताका साथ प्रतिक्षा गरिरहेका छन् ।
