पोखरा, २ पुस । पोखरा–१५ का एक सय ज्येष्ठ नागरिकलाई अन्तरजिल्ला भ्रमणमा लगिएको छ । पोखरा महानगरपालिका वडा नं १५ को कार्यालयले आफ्नो अन्तरजिल्ला भ्रमण आर्यक्रम अन्तरगत वडाका एक सय ज्येष्ठ नागरिकलाई शनिबार भ्रमणमा लगेको हो ।
व्यस्त समयका बापजुत घर परिवारले ज्येष्ठ नागरिकलाई समय दिन नभ्याउने र उनीहरुलाई नयाँ ठाउँमा घुम्ने चाँहना हुँदाहुँदै पनि जान नसक्ने अवस्थामा वडाको वार्षिक बजेटबाट उनीहरुलाई भ्रमण लगिएको जानकारी वडाध्यक्ष तोरणबहादुर बानियाँले दिनुभयो ।
पछिल्ला वर्षमा वाहिरी जिल्लामा भएका विकास र परिवर्तनका बारेमा अवलोकन गराउन सम्मान स्वरुप उनीहरुलाई एक दिने भ्रमणमा लगिएको हो । शनिबार निस्केको वृद्ध वृद्धाहरुको टोलीलाई वाग्लुङ जिल्लाको कालिका मन्दिरको दर्शन, पर्वैतका कुश्माका झोलुङ्गे पुल र बन्जी जम्पको अवलोकन गराइने र शनिवार राति पोखरा नै फर्कने कार्यक्रम रहेको जानकारी वडाध्यक्ष बानियाँले दिनुभयो ।
पोखरा महानगरपालिकाका प्रमुख धनराज आचार्यले भ्रमण टोलीलाई सफल यात्राको शुभकामना दिँदै न्यानो गलबन्दी लगाएर बिदाइ गर्नुभएको थियो । प्रमुख आचार्यले औपचारिक विद्यालयको शिक्षासँगै आफूले जीवनमा भोगेका भोगाई र शिक्षा ज्येष्ठ नागरिकबाट पनि सिक्नुपर्ने भन्दै ज्येष्ठ नागरिकलाई सधैँ सम्मान गर्नुपर्ने बताउनुभयो ।
अहिले महानगरले सबै ज्येष्ठ नागरिकका लागि सम्मान स्वरूप विभिन्न योजना बनाएर कार्यक्रम अगाडि सारेको बताउँदै प्रमुख आचार्यले महानगर भित्रका ज्येष्ठ नागरिकलाई दिइँदै आएको सामाजिक सुरक्षा भत्तामा पोषण कार्यक्रम शीर्षक अन्तरगत थप दुई सय रुपैयाँ दिँदै आएको बताउनुभयो ।
यस्तै, भ्रमणमा सहभागी मध्ये ज्येष्ठ नागरिक श्यामप्रसाद सुवेदीले पछिल्लो समय वृद्ध वृद्धाहरूलाई उचित सम्मान नगरिरहेको अवस्थामा पहिलो पटक यसरी वडाले सम्झिएर भ्रमणमा लैजान लागेकोमा खुसी व्यक्त गर्नुभयो । भ्रमणको नेतृत्व वडा सदस्य बलराम पौडेल गर्नुभएको छ ।
ज्येष्ठ नागरिकको स्वास्थ्य अवस्थालाई मध्यनजर गर्दै एक जना नर्ससहित तीन जना स्वास्थ्य स्वयंसेवीकाको टोली र रेखदेखका लागि वडाका तीन जना कर्मचारी समेत भ्रमण टोलीसँगै गएको जानकारी वडाध्यक्ष बानियाँले दिनुभयो ।
