काठमाडौँ – अदिति बुढाथोकी नेपाली मोडलिङसँग चासो राख्ने परिचित नाम हो । नायक अनमोल केसीसँग फिल्म ‘कृु’ मा को(स्टार भएर काम गरेपछि उनको चर्चा फिल्ममा पनि उत्तिकै भयो । यद्यपि उनको अभिनयले मोडलिङझैँ चर्चा नपाउँदा अर्को फिल्म पाउन मुस्किल भयो ।
सामाजिक सञ्जालमा सक्रिय धेरै फ्लोअर भएकी अदिति मुम्बईमा बसेर मोडलिङ गर्छिन् । थुप्रै पटक भारतीय मिडियामा फिचर्ड भइसकेकी छिन् । सामाजिक सञ्जालमा आकर्षक फोटो राख्ने कारणले पनि उनलाई पछ्याउने फ्यानको संख्या धेरै छ । तर, यसको प्रभाव उनको करियरमा देखिदैन ।
डेब्यु फिल्ममा अनमोलले उनलाई छायाँमा पारे । लभरब्वाई बनिरहेका अनमोल ‘कृु’ मार्फत एक्सन अवतारमा प्रस्तुत भए । यसकारण पनि भारतमा मोडलिङ गरिरहेकी अदितिको उपस्थिति अनमोलको अगाडि छायाँमा रह्यो । मिडियामा खोजे जस्तो स्पेश नपाएपछि अदितिले एक्लै पत्रकार भेटघाट कार्यक्रम गरिन् ।
फिल्म रिलिजपछि अदिति मुम्बईमै सक्रिय भइन् । उनलाई नेपालबाट अफर नगएको होइन, यद्यपि त्यहाँ उनले काम गर्ने सोच बनाएको कुनै फिल्म बनाउने कम्पनी थिएनन् ।
आफूले चाहेको व्यानरले अफर नगरेपछि अदितीले दोस्रो फिल्म होम प्रोडक्सनबाट गरेकी छिन् । ‘बाबरी’मा आफ्नो माता पितालाई निर्माता बनाएर उनले ‘कृ’कै निर्देशक सुरेन्द्र पौडेललाई लिएर काम गरिन् । फिल्मको शिर्ष गीत सार्वजनिक भयो । दर्शक पनि रुचाएका छन् । फिल्मको टिजर समेत सार्वजनिक भइसकेको छ ।
गीत र टिजर सार्वजनिक भएपछि अदितीलाई भन्दा उनको को–स्टार धिरज मगरलाई फाइदा पुर्याएको छ । टिजरमा फरक लवजसहित देखिएका धिरजलाई दर्शकले नोटिस गरेका छन् ।
टिजर सार्वजनिक हुँदा धिरजको आवाज होइन कि भन्ने आशंका रहदा नै उनले कार्यक्रममा लाइभ डायलग बोलेपछि फ्यान झनै प्रभावित भए । अर्थात् ‘बाबरी’मा पनि अदितीको भन्दा धिरजकै चर्चा छ । यसले गर्दा डेब्यु फिल्ममा अनमोलको छायाँ भन्दा बाहिर निस्किन नसकेकी अदिती यसपटक पनि त्यहि अवस्थाबाट गुज्रिने चिन्ता बढ्दो छ ।
