काठमाडौं । पशुपति सेभिङ एन्ड क्रेडिटका सञ्चालकहरु विरुद्ध बचतकर्ताले सीआईबीमा जाहेरी दर्ता गराइरहेका छन् । ललितपुरमा मुख्य कार्यालय भएको पशुपतिका पूर्व अध्यक्ष सीबी लामा अहिले कारागारमा छन् । उनलाई कारागारबाट झिकाएर अनुसन्धान गरिने सीआईबीका एसपी होबिन्द्र बोगटीले जानकारी दिए ।
एसपी बोगटीका अनुसार पशुपति सेभिङका सञ्चालकहरुबिरुद्ध बचत गरिएको रकम फिर्ता पाउन नसकेको भन्दै २६७ जना बचतकर्ताले जाहेरी दर्ता गराएका हुन् । अहिलेसम्मको अनुसन्धानबाट सीबी लामा सहितका सञ्चालकहरूले ५७ करोड रकम अपचलन गरेको अनुसन्धानबाट खुलेको छ । समस्याग्रस्त सहकारी व्यवस्थापन समितिको कार्यालयमा पशुपति सेभिङ एन्ड क्रेडिटका ५४ जना बचतकर्ताले निवेदन दिएका छन् । अझै सम्म उजुरी दर्ता गर्ने काम नरोकिएको प्रहरीले जनाएको छ ।
