दुहुँदादुहुँदैको ताजा दूध अमृततुल्य मानिन्छ । त्यस्तो दूधमा वातविकार निर्मूल पार्ने, शरीरलाई परिपुष्ट गर्ने, पाण्डुरोग तथा चर्मविकारविरुद्ध लड्ने, दुर्बलता र कमजोरीलाई हटाउने, ओजस्को वृद्धि गर्ने तत्वहरु विद्यमान हुन्छन् । त्यस्तै, धारोषण दूधले शरीरको जलन र हातगोडाको कम्पन घटाउन मद्दत गर्नुका साथै पित्तप्रकोपलाई नाश गर्ने, रगतको अशुद्धि कम गर्ने, अग्निलाई प्रदीप्त गर्ने र अनेकौँ जीर्ण रोगलाई ठिक गर्ने शक्ति प्रदान गर्दछ ।
आयुर्वेद स्वास्थ्यवेत्ताहरुको मतानुसार दूध रोगव्याधिमा पथ्य (सजिलोसँग पच्ने), आयुप्रदायक, यौवनलाई अक्षय राख्ने अमृत हो । यसलाई मांसपेशीको वृद्धि गर्ने महत्वपूर्ण पोषण मानिन्छ । व्यायाम, मैथुन र अधिक श्रम गर्नेका लागि यो पीयुषसमान हो । यसले वृद्ध, अशक्त तथा बालबच्चालाई जीवन प्रदान गर्दछ भने सबै उमेरका व्यक्तिमा यसको नियमित सेवनले रगत, वीर्य र ओजको वृद्धि गर्दछ ।
साभारः ‘खाने कसरी पिउने कसरी’ पुस्तकबाट
