काठमाडौं – यसपटकको चुनाबमा मतदाताले दल भित्रै विद्रोह गरेर मैदानमा उत्रिएका ५ जना तथा भर्खरै दलिय राजनीतिमा भुमिका खोजिरहेका झण्डै एक दर्जन उम्मेद्वारलाई जिताएका छन् । काठमान्डौं, ललितपुर र चितवनमा यसपटक स्वतन्त्रले ठुला दलका नेतालाईपछि पारेका छन् ।
दल दर्ताको भएको पाचँ महिना मै स्वतन्त्र दलका उम्मेद्वारले सत्ता गठबन्धन तथा एमालेसँग चर्को प्रतिस्पर्धा गरेर संसदमा सिट हत्याएका छन् । नयाँ उदाएका पार्टीहरुले मुलुकको अहिलेको सत्ताकेन्द्रित राजनीति र परिवारवादको चंगुलबाट मुक्त गराउन संघर्ष गरेको आभासमात्र दिलाउन सकेपनि जनमतको वास्तविक कदर हुने विश्लेषकहरुको विश्लेषण छ ।
ठूला सपना देखाउने भन्दा नागरिकको सहज दैनिकीमा केन्द्रित बिषयमा दरो आवाज उठान गर्दै ठुला दललाई खवरदारी गर्न नयाँ अनुहार यसपटक जनप्रतिनिधिका रुपमा अनुमोदन भएका छन् । नागरिकको आवश्यकता र समस्या सम्बोधनको एजेन्डा लिएर मत माग्ने उम्मेदवारले चुनाब जितेकोमा नागरिक पनि खुसी छन् । मतदाताले नयाँ दलसँग देश विकासको बाटोमा धेरै अपेक्षा राखेका छन् ।
दलहरु प्रतिको वितृष्णा यसपटक नागरिकले ब्यालेटमा पोखेका हुन् । तर अहिले भरोसा गरेको नयाँ दलमा पनि सत्ता र शक्तिको रोग समस्या बन्न सक्ने धेरैको आशंका छ । राजनीतिक विश्लेषकहरु संसदमा प्रवेश गरेका नयाँ दलहरु अहिले नै सत्ता केन्द्रित नहुन र प्रतिपक्षमा बसेर जनताको साथ दिन सुझाब दिन्छन् ।
भर्खरै उदाएका नयाँ दल र यिनका प्रतिनिधिहरुले जनता सामू गरेका वाचा पूरा गर्न सक्नु पर्दछ । पुराना राजनीतिक दल जस्तै नयाँ दलले पनि सत्ता केन्द्रित राजनीति मात्र गरे भने समृद्ध नेपाल सुखी जनताको सपना कहिल्यै पूरा हुने छैन ।
