काठमाडौं – काठमाडौंको मिनभवनमा ४ रोपनी भन्दा बढी व्यक्तिगत जग्गा भू–माफियाको कब्जामा पुगेको छ । स्थानीय गणेश अवालेको ४ रोपनी ८ आना ३ पैसा १ दामको जग्गा विभिन्न बहाना गरी भू–माफियाले कब्जा गरेका हुन् । अनि जग्गा कब्जा प्रकरणका मुख्य योजनाकार जग्गा रोड शो रियल स्टेट प्रा.ली.का सञ्चालक कालु गुरुङ रहेको खुलेको छ ।
कसरी पुग्यो करोडौंको व्यक्तिगत जग्गा भू–माफियाको कब्जामा ?
मिनभवन स्थित नेपाल कर्मश क्याम्पसको अगाडीको जग्गामा १० तले अपार्टमेन्ट अर्थात व्यवसायिक भवन बनाउने बहानामा दृष्टिबन्धक पास गर्ने भन्दै झुक्याएर आफ्नो नाममा पास गरेको पीडितको आरोप छ । पीडित अवालेको घरमा भाडामा बस्दै आएका नारायण बहादुर कार्कीले जग्गाधनीलाई झुक्याएर यस्तो काम गरेका हुन् ।
पीडितका अनुसार ३४३ नं. कित्ताको ३ रोपनी ८ आना ३ पैसा १ दाम क्षेत्रफलको जग्गामा व्यवसायिक भवन बनाएर पैसा आर्जन गर्ने प्रलोभन देखाएर पीडित अवालेलाई कार्कीले फसाएका थिए । सोही प्रलोभनमा परी जग्गाधनी अवाले र नारायण बहादुर कार्कीले सम्झौता गरेका थिए । २०६१ चैत १९ गते हस्ताक्षरित उक्त सम्झौतामा मनोजकुमार मिश्र र पीडतका जेठा छोरा प्रकाश अवाले साक्षी थिए ।
सम्झौता बमोजिम २०६२ फागुन २ गते दृष्टिबन्धक पास गर्ते भन्दै पीडक पक्ष आएको थियो । त्यो समयमा कार्की पक्षले दृष्टिबन्धकका नाममा झुक्काएर राजीनामा पास गरिएको पीडिति अवालेको आरोप छ । घरधनी गणेश अवालेको घरमा बस्दै आएका नारायण बहादुर कार्कीले यसअघि अहल्या श्रेष्ठ नामक महिलाको प्रयोग गरी १ रोपनी जग्गा हत्याईसकेका थिए ।
२०५४ सालमा कार्कीले अहल्या श्रेष्ठको नाममा घर बनाउने मौखिक सम्झौता भएपछि १ रोपनी जग्गा बकसपत्र गरी ल्याएका थिए । पछि फिर्ता गर्ने सर्तमा १० लाख रुपैयाँमा उक्त जग्गा बकसपत्र गरी अहल्याको नाममा ल्याईएको थियो । तर, उक्त जग्गा फिर्ता गर्नुको सट्टा विभिन्न बहानामा झुक्काई लालपुर्जा चोरी गर्ने काम भईरहेको पीडितको आरोप छ ।
अहल्याको नाममा बकसपत्र भएको ३४१ नं. कित्ताको जग्गालाई कित्ताकाट गरी ३४२ र ३ सय ४३ बनाईएको भेटिएको छ । पछि सोही ३ सय ४२ कित्ताको जग्गा दोस्रो पटक कित्ताकाट गरी ३६७ र ३६८ बनाईएको थियो । त्यसपछि ३६७ नं. कित्ताको जग्गा २०५७ सालमा माथवर सिंह बस्नेतलाई र ३६८ नं. कित्ताको ८ आना जग्गा प्रविर समशेर जबरालाई राजिनामा पास गरेको देखिएको छ । माथवर सिंह बस्नेतलाई पास गरिएको उक्त जग्गा पुनः प्रविर समशेरलाई नै राजिनामा पास गरेको देखिएको छ । यसरी हेर्दा अहल्या श्रेष्ठ र माथवर सिंह बस्नेतहुँदै उक्त जग्गा प्रविर समशेरको नाममा पास गर्ने योजना पहिले देखि नै रहेको पाईएको छ ।
प्रविर समशेरका नाममा पास भएर मात्रै जग्गाको कारोबार रोकिदैन् । त्यसपछि प्रविर समशेरले आफ्नो चिनजानको व्यक्ति मनोज कुमार मिश्र सञ्चालक रहेको प्रमा डेभलपर्स प्रा.ली.को नाममा कुमारी बैंकबाट ३ करोड बढी रकम झिकेको देखिएको छ । रकम निकालेको केही समयपछि मनोज कुमार मिश्रले दबाव दिँदै कुमारी बैंकलाई लिलाम गर्नका लागि उक्साएको देखिएको छ ।
जग्गा लिलाम भएपछि रामकृष्ण हुमागाईंले उक्त जग्गा सकारेका थिए । कुमारी बैंकको पैसा तिरेपछि हुमागाईले उक्त जग्गा रोड शो रियल स्टेट प्रा.ली.का सञ्चालक कालु गुरुङलाई बिक्री गरेको देखिएको छ । जग्गा आफ्नो नाममा गर्दा वित्तिकै तत्कालिन समयको नेपाल बंगलादेश बैंक अर्थात नविल बैंकमा धिलो राखी १३ करोड ७८ लाख २५ हजार रुपैयाँ निकालेका थिए । कालु गुरुङले पनि उक्त जग्गा बिक्री गरी सकेको पाईएको छ ।
यसरी योजनाबद्ध रुपमा स्थानीइलाई झुक्याएर जग्गा हत्याएको देखिएको छ । एकजना मात्रै नभएर जग्गा हत्याउनका लागि गिरोह नै सक्रिए भएपछि पीडित गणेश अवाले न्यायालयको ढोका ढकढकाई रहेका छन् । पहुँच र पावरका भरमा न्यायालयलाई समेत प्रभावमा पारेका गिरोहका कारण पीडित अवालेले करोडौ पर्ने आफ्नो जग्गा फिर्ता पाउन सकेका छैनन् ।
साढे ७ वर्ष अघिको त्यो घटना…
२०७३ साल असारमा गणेशलाल अवारको परिवार घर भित्रै भएको समयमा बाहिराट एकाएक घरमाथि डोजर चलेको थियो । भित्र रहेका ८ महिने बच्चा र आमा झण्डै घर भित्रै पुरिएका थिए । केहिबेरमा उनिहरुलाई निकालेर घरमाथि डोजर चलाई हेर्द हेर्दै घरलाई भग्नावशेषमा परिणत गरिएको थियो । त्यस समयमा घर र जग्गाको विषयमा अदालतमा २१ वटा मुद्दा विचाराधीन हुँदा हुँदै गुण्डागर्दी शैलीमा घरमाथि डोजर चलेको थियो ।
