काठमाडौं । गएराति ललितपुर महानगरपालिका–२६ को ढोलाहिटीमा दुई समुहबीच भएको घटनामा प्रहरी पुरानो रिसिइबीका कारण उक्त घटना घटेको प्रहरीले निष्कर्ष निकालेको छ । गए राति ढोलाहिटीस्थित डि–पोपिना रेस्टुरेन्टमा दुई जनामाथि चक्कु प्रहार भएको थियो । उक्त चक्कु प्रहारबाट सुनसरीको धरान घर भएर ढोलाहिटी बस्ने २८ वर्षीय रोबस राई र पाँचथर घर भएर खुमलटार बस्ने ३० वर्षीय पुजन राईको मृत्यु भएको थियो ।
प्रहरी उक्त प्रकरणमा अनुसन्धानका लागि प्रहरीले १८ जनालाई नियन्त्रणमा थप अनुसन्धान गरिरहेको छ । ललितपुरका एसएसपी शेखर खनालका अनुसार रोबसको कोखमा चक्कु प्रहार गरिएको र पुजनको तिघ्रामा प्रहार गरेर रेस्टुरेन्टमा लामो समय राखेर ओभर ब्लिडिङ्ग गराएको भेटिएको थियो ।
पुजन राईलाई सुमेरु अस्पतालमा र रोबसलाई पाटन अस्पतालमा भर्ना गरेपछि प्रहरीले खबर पाएको थियो । राति ११ बजेतिर घटनाबारे खबर पाएपछि अनुसन्धान थालिएको एसएसपी खनालले जानकारी दिए । उनीहरूको हत्याको मुख्य कारण ‘पुरानो रिसिइबी’ भएको प्रहरीको प्रारम्भिक अनुसन्धान निष्कर्ष छ ।
