काठमाडौं – चिनियाँ गिरोहले रोजगारीको प्रलोभन दिएर नेपाली युवायुवतीलाई दक्षिणपूर्वी एसियाली देश लाओस तस्करी गर्न थालेको रहस्य खुलेको छ । प्रहरीका अनुसार चिनियाँ गिरोहले तस्किरी गरि नेपालबाट लाओस पुर्याएका १० जनाको हालै मात्र उद्धार गरिएको छ । त्यस्तै केही व्यक्ति अझै पनि लाओसमै समस्याग्रस्त अवस्थामा छन् ।
मानव तस्करीमा संलग्न ३० वर्षीया चिनियाँ नागरिक चेन याङ र ३३ वर्षीया रौन चाओहाङलाई प्रहरीको मानव बेचबिखन अनुसन्धान ब्युरोले काठमाडौंबाट पक्राउ गरेको छ । उनीहरूले नेपालीसँग मिलेर नेपाली युवायुवतीलाई लाओस लगेर बन्धक बनाई कल सेन्टरमा काम लगाउने गरेको ब्युरोका निर्देशक एसएसपी अनुराग द्विवेदीले बताए ।
तस्करीमा संलग्न दुईमध्ये एक चिनियाँ नागरिकलाई बंगलादेश भाग्न लागेको अवस्थामा अन्तर्राष्ट्रिय विमानस्थलबाट पक्राउ गरिएको हो । उनीहरूलाई सघाउने नेपाली नागरिकहरूको पनि खोजी भइरहेको छ ।
ब्युरोमा तीन युवती र सात युवकले यस विषयमा उजुरी दिएका छन् । उनीहरूले चिनियाँ नागरिकसँग चिनजान भएका निरोज मानन्धर र रोबिन शाक्यको सहयोगमा आफूहरूलाई आकर्षक जागिरको प्रलोभनमा लाओस पुर्याएर बन्धक बनाई अवैध काममा लगाएको उजुरीमा उल्लेख गरेका छन् ।
भिजिट भिसामा कडाइ गरिएपछि भारतको बाटो हुँदै तस्करी
भिजिट भिसामा विदेश जान नेपालमा कडाइ भएपछि उनीहरूलाई गत भदौमा भारतको कोलकात्ता विमानस्थल हुँदै थाइल्यान्डको बैंककबाट लाओस पुर्याइएको थियो । त्यहाँ बन्धक बनाई अनलाइन ठगीजस्ता अवैध काममा लगाएको उल्लेख छ । फेसबुकमा राम्री युवतीको फोटो राखी नक्कली आइडी खोल्ने र च्याट गरी प्रेमको नाटक गरी ठगी गर्ने काममा आफूहरूलाई प्रयोग गरिएको युवतीहरूले बताएका छन् ।
यस्तो काम नगर्ने भन्दा उल्टो पैसा माग्दै उनीहरूलाई यातना दिइएको थियो । मासिक १५ सय अमेरिकी डलर तलब हुने र पछि श्रम भिसासमेत प्राप्त हुने आश्वासन दिएर लाओस पुर्याइएको थियो । केहीलाई निःशुल्क त केहीसँग पैसा लिएर लगिएको प्रहरीको भनाइ छ ।
