राजकोट । इंग्ल्याण्डविरुद्धको तेस्रो टेस्ट खेलमा डेब्यू गरेका सरफराज खानको रनआउटको निकै चर्चा भइरहेको छ । पहिलो खेलमा उनको अर्धशतक होस् वा उनी आउट हुने तरिका र यसमा रोहित शर्माको प्रतिक्रिया, सबै विषयबारे खुबै चर्चा भइरहेको छ ।
सरफराज खान सामाजिक सञ्जालमा ट्रेन्डिङ गर्न थालेका छन् । रवीन्द्र जडेजाले खेद व्यक्त गरे पनि सर्फराजको रनआउटको दोष उनलाई नै लगाइरहेका छन् ।
जडेजाले सरफराज खानको रनआउटप्रति दुःख व्यक्त गरेका छन् । उनले आफ्नो इन्स्टाग्राम स्टोरीमा लेखेका छन्, ‘मलाई सरफराज खानको लागि नराम्रो लागेको छ। मेरो गलत कल थियो। उनले राम्रो खेले।’
वास्तवमा, टेस्ट म्याचमा डेब्यू गरिरहेका सरफराज खान रनआउट भए जब जडेजाले रन लिनको लागि कल गरे तर आफै अगाडि बढेनन्। जडेजा ९९ रनको व्यक्तिगत स्कोरमा खेलिरहेका थिए । मिडअनमा एन्डरसनको फुल लेन्थ बल खेलेर रवीन्द्र जडेजा रन बनाउन चाहन्थे ।
सरफराजले पछि हट्ने प्रयास गर्दा मार्क वुडले सिधा थ्रोले रनआउट पारे। ६२ रनमा खेलिरहेका सरफराज आफ्नो टेस्ट करियरको पहिलो इनिङ्समा यस्तो दुर्भाग्यपूर्ण तरिकाले रनआउट भए ।
सरफराज आउट हुनेबित्तिकै रोहित शर्मा ड्रेसिङ रुममा क्रोधित देखिन्थे । जडेजा अर्को छेउमा उदास थिए। युवा ब्याट्सम्यान सरफराज पभिलियन फर्किँदा दर्शकले ताली बजाएर स्वागत गरेका थिए ।
यस खेलमा रवीन्द्र जडेजाले २१२ बलमा ९ चौका र दुई छक्का प्रहार गर्दै ११० रन बनाएर अविजित छन् । पहिलो दिनको खेल समाप्त हुँदा भारतले पाँच विकेट गुमाएर ३२६ रन बनाएको छ ।
सरफराजलाई रनआउटको विषयमा प्रश्न सोधिएको थियो । उनले भने, ‘कहिलेकाहीँ गलत कम्युनिकेसन हुन्छ । यो खेलको भाग हो। कहिले रन आउट हुन्छ, कहिले हुन्न । यी कुराहरू भइरहन्छन्।’ सर्फराज खानले आफ्नो टेस्ट करियरको पहिलो इनिङ्समा ९ चौका र एक छक्काको मद्दतले ६६ बलमा ६२ रन बनाए ।
पहिलो दिनको खेल सकिएपछि सरफराजलाई उनको अनुभवबारे सोध्दा उनले भने, ‘मलाई धेरै राम्रो लाग्यो। म पहिलो पटक मैदानमा आएको हुँ। मैले क्याप पाएँ, मेरो बुबा पनि त्यहाँ हुनुहुन्थ्यो। उहाँले मलाई सिकाउनुभयो। मेरो जीवनकालमा एक पटक भारतीय टोलीबाट खेलेको देख्ने उनको सपना थियो।’
