शयन कक्षमा बिर्सेर पनि नराख्नुहोस् यी पाँच चिज

हाम्रो जीवनमा वास्तुको विशेष महत्व हुन्छ । हामीले घरमा राखिने हरेक चिजलाई वास्तुसम्मत तरिकाले राख्नुपर्छ । यदि कसैको घरमा वास्तु दोष छ वा भनौँ सामानहरु सही तरिकाले राखिएको छैन भने घरका सदस्यले कुनै न कुनै समस्याको सामना गर्नुपर्ने हुनसक्छ । त्यसैले वास्तुलाई हामीले नजरअन्दाज गर्नै हुँदैन । अझ हामी सुत्ने बेडरुममा वास्तुको ठूलो महत्व हुन्छ । वास्तु शास्त्रले हामीलाई बेडरुममा केही कुरा राख्नबाट रोक्छ । यस्ता केही चिज बेडरुममा राख्दा श्रीमान्–श्रीमतीको सम्बन्धमा पनि दरार निम्तिन सक्छ —

– सुत्ने कोठामा चम्किलो रङ लगाउँदा यसले घरमा नकारात्मकता फैलन्छ । यदि कोठामा रातो, सुन्तले वा अन्य गाढा रङ लगाइएको छ भने यसले निद्रामा प्रभाव पार्छ । गलत रङ छनोट गर्दा मानसिक स्थितिमा पनि गहिरो प्रभाव पर्छ । बेडरुममा सधैँ निलो वा हल्का रङको प्रयोग गर्नुपर्छ ।
– बेडरुममा जुत्ता राख्दा यसले नकारात्मक ऊर्जाको सञ्चार गराउँछ र घरको वातावरण बिथोल्छ । बेडरुमा जुत्ता राख्दा कोठा फोहोर त हुन्छ नै यसले शारीरिक र मानसिक समस्या पनि उत्पन्न हुन्छ ।
– सुत्ने कोठामा डस्टबिन वा कुचो राख्नु अशुभ मानिन्छ । यस्ता चिज बेडरुममा राख्दा नकारात्मक ऊर्जा तीव्र रूपमा फैलिन्छ जसले आर्थिक समस्याको पनि सामना गर्नुपर्ने हुनसक्छ ।
– वास्तु शास्त्रको अनुसार सुत्ने कोठामा मैलो तन्ना राख्दा घरमा नकारात्मक ऊर्जा फैलन्छ । यसले विभिन्न रोग पनि बढाउँछ, साथै फोहोर तन्नाले निद्रामा पनि असर पार्छ ।
– सुत्ने कोठामा सकेसम्म ऐना राख्नु हुँदैन, राख्नै परेमा सुतिरहेका बेला आफ्नो प्रतिबिम्ब त्यस ऐनामा नपरोस् ।