काठमाडौं । प्रभु साह नेतृत्वको आम जनता पार्टीले तराई मधेसमा सशस्त्र हिंसा मच्चाउने प्रयोजनका लागि छुट्टैअर्ध सैनिक बल निर्माण गरेको छ । साह माओवादी छाडेर एमालेमा रहँदा आईटी आर्मीको परिकल्पना गरेका थिए । त्यही आईटी आर्मीलाई अहिले उनले आम जनता पार्टीको अर्धसैनिक बलमा रुपान्तरण गरेका छन् ।
पुस १४ गते आम जनता पार्टीको स्थापना दिवसको अवसरमा राष्ट्रिय भेलासहित सुरू भएको सैनिक तालिम अहिले पनि जारी छ । सात दिनसम्म चल्ने तालिममा विभिन्न जिल्लाबाट युवा जम्मा पारिएको छ । प्रभु साहले रौतहटको मौलापुरमा आईटीसम्बन्धी प्रशिक्षणदेखि सैनिक अभ्याससमेत गराउँदै आएका छन् ।
आजपाका अध्यक्ष प्रभु साहले देशका सुरक्षा अधिकारीहरु संकटबारे चिन्तित भएनन् र पार्टीको लुटतन्त्रलाई चोख्याउन लागेमा आईटी आर्मीले नेपालको मुख्य सैनिक फोर्सको काम गर्ने दाबी गरेका छन् । माओवादी सशस्त्र द्वन्द्वमा सामेल भएकाले पनि प्रभुमा अझै पनि लडाकु राख्न सके नेता बनिन्छ, सबैले मान्छन् भन्ने सोच हाबी देखिएको छ ।
तर आईटी आर्मीको मधेस प्रदेश अध्यक्ष बालाशंकर कुशवाहाले भने प्रभु साहको भन्दा भिन्नै दाबी गरेका छन् । ‘अहिलेको सूचना प्रविधिको युगमा युवाहरुलाई आईटीसम्बन्धी तालिम अत्यावश्यक छ, किनकि आईटीबिना देशको विकास सम्भव छैन । वेदेशिक रोजगारीमा भइरहेको ठगी रोक्न, भ्रष्टाचारीहरुलाई दण्डित गर्न तथा भगौड़ा दलालबाट देशलाई बचाउन आईटी सेना निर्माण अपरिहार्य आवश्यकता भइसकेकोले यो तालिम गर्न लागेको हो,’ उनले भनेका छन् ।
आजपाले अहिलेको व्यवस्था असफल भइसकेको घोषणा गर्दै देशलाई संकटबाट बचाउन तत्काल अन्तरिम सरकार गठनको माग गर्दै आएको छ ।आईटी आर्मीको राष्ट्रिय भेलासहितको विशेष तालिम सम्पन्न भएको छ । भेलाबाट चन्द्रभूषण साहको नेतृत्वमा १५१ सदस्यीय केन्द्रीय कमिटी चयन भएको छ ।
