लोकतन्त्रपछि गाउँ–गाउँमा विकास निर्माणका संरचना बनेको भएपनि अहिले त्यसको उपभोग गर्ने मानिस कम हुँदै गएको भन्दै राष्ट्रपति रामचन्द्र पौडेलले चिन्ता व्यक्त गरेका छन । लोकतन्त्रको प्रतिफल डेलिभर गर्ने संरचना गाउँमै पुग्दा पनि गाउँहरु रित्तिन थालेको भन्दै त्यसको कारण खोज्न पौडेलले आग्रह गरेका छन ।
सरस्वती बहुमुखी क्याम्पसको ६५ औं वार्षिकोत्सवलाई मंगलबार सम्बोधन गर्दै राष्ट्रपति पौडेलले लोकतन्त्रपछि मुलुकको शिक्षा, सञ्चार, सडक, स्वास्थ्य र विद्युत्तीकरणको क्षेत्रमा भएको विकासका बाबजुद त्यसको उपभोग गर्ने मानिसको अभावमा आज गाउँ रित्तिदै गएको भन्दै चिन्ता व्यक्त गरेका हुन ।
राष्ट्रपति पौडेलले नीति निर्माण र शासनसत्तामा बस्नेलगायत सबैको चिन्ता आज गाउँ रित्तिनुको कारण र समाधान खोज्नमा केन्द्रित हुनुपर्ने बताएका छन । कुनै पनि देशको शिक्षा त्यस देशको सामाजिक, आर्थिक अवस्था र देशको आवश्यकता अनुरुप निर्धारण हुनुपर्नेमा जोड दिँदै उनले बदलिँदो परिस्थितिमा देश विकासमा टेवा पु-याउने र विश्व बजारमा पनि प्रतिस्पर्धी हुनसक्ने शिक्षा नीति र कार्यक्रम आजको आवश्यकता रहेको उनले बताए ।
शिक्षा र रोजगारीका लागि दैनिक रुपमा हजारौं नेपाली युवाहरु विदेशिने क्रम रोक्नेगरी रोजगारी र सीपमूलक शिक्षा दिन जरुरी रहेकामा उनले जोड दिए । कुनै पनि देशको शिक्षा त्यस देशको सामाजिक, आर्थिक अवस्था र देशको आवश्यकता अनुरुप निर्धारण हुनुपर्नेमा उनको जोड थियो ।
राष्ट्रपति पौडेलले धेरै शैक्षिक उन्नति र प्रगतिका बावजुद पनि सरस्वती क्याम्पसको भौतिक संरचना खासगरी अत्याधुनिक भवनलगायतको अभाव हुनु चिन्ताको विषय भएको भन्दै भौतिक पूर्वाधारलगायतमा सहयोग गर्न सरकारलाई आग्रह समेत गरेका छन ।
