वि.वि.याक्खा
गरिबी र अभाव साथै तिरस्कार के हो भनेर राम्रोसँग थाहा थियो । किनभने रिदमले जीवनमा यी कुराहरू भोग्दै नै आएका थिए । तैपनि उसले जिन्दगीमा आफ्नो उद्देश्य र रुचि अनुरुपकै मेहनत र काम गर्न भने जोश र जाँगरका साथ नै लागिपरिरहे ।
आफन्त र चिनेजानेकाहरुले उसलाई एक खोटो पैसा ठान्दथे । यतिसम्म कि उसलाई कसैले नातेदार भनेर चिनाउन लाज मान्थे ।
रिदम मनमनै केही न केही त गर्नुपर्छ भनेर भन्ने चाहिँ अठोट लिन्थे । अरुभन्दा केही फरक प्रतिभाको भएर पनि अनौठो देखिन्थे । सायद ! केही भविश्य नै नदेखेर होला उनलाई बिबाहसम्म गर्ने तयारीमा पुगेकी ती प्रेमिका सोनिराले पनि अन्तै बाटो मोडिन । तैपनि होस् सम्हालिएर निरन्तर उनी आफ्नै उद्देश्यमा लागिरहे ।
एक अन्तर्राष्ट्रिय चित्रकारिता प्रत्योगितामा रिदम बिजेता बनेको र उसले सुबिधासम्पन्न आकर्षक पुरस्कार जितेको कुराहरु देश तथा विदेशीका सञ्चार क्षेत्रहरुमा एकैपटक सनसनी छाउन पुग्यो ।
यस्तैमा पत्रकारले सोध्यो— तपाईंका सफलताको राज के हो ?
रिदमले श्वास तान्दै भने — जीवनमा मैले प्राप्त गरेको चोट हो ।
यति बेला भने हिजोका तिनै आफन्त र साथीभाइहरुका फोन निरन्तर आइरहेका थिए ।
