अमेरिकी पूर्व राष्ट्रपति डोनाल्ड ट्रम्पको मेक्सिकोसँगको सीमामा पर्खाल लगाउने योजनालाई जो बाइडेन प्रशासनले अघि बढाउने घोषणा गरेको छ । मुख्य गरी गैरकानुनी प्रवेश रोक्न सीमा क्षेत्रमा आवश्यक व्यवस्थापनलाई बलियो बनाउने अमेरिकाले जनाएको छ । अमेरिकाको डिपार्टमेन्ट अफ होमल्याण्ड सेक्युरिटीका मन्त्री अलेजान्ड्रो मेयरकासले अमेरिकी फेडेरल रजिस्टरमा जारी गरेको सूचनामा गैरकानुनी प्रवेश रोक्नका लागि तत्काल अमेरिकाको सीमा क्षेत्रमा भौतिक अवरोध र सडक निर्माण आवश्यक रहेको उल्लेख छ ।
अमेरिका–मेक्सिको सीमाको उच्च अवैध प्रवेश क्षेत्र रियो ग्रान्डी भ्याली खण्डमा पर्खालको नयाँ खण्ड निर्माण गरिने मन्त्री मेयरकासले बताएका छन् । यो आर्थिक वर्षमा अमेरिकामा दुई लाख ४५ हजारभन्दा धेरै व्यक्ति अवैधरूपमा प्रवेश गरेको तथ्याङ्क छ । तर अमेरिकी राष्ट्रपति जो बाइडेनले सन् २०२१ को जनवरीमा पदभार ग्रहण गरेकै दिन एक घोषणा गर्दै सीमामा पर्खाल निर्माण गर्न करदाताको थप रकम नछुट्याइने घोषणा गरेका थिए ।
बाइडेनका लागि अवैध आप्रवासन एउटा प्रमुख राजनीतिक मुद्दा बनेको छ र विपक्षी रिपब्लिकनहरूले उहाँमाथि सीमा नीतिमा ढिलासुस्ती गरेको आरोप लगाउँदै आएका छन् । सन् २०२४ को राष्ट्रपतीय चुनावमा रिपब्लिकन पार्टीका तर्फबाट उम्मेदवार बनेका पूर्व राष्ट्रपति ट्रम्पले यो कदमलाई आफू सही रहेको देखाएको प्रतिक्रिया दिएको समाचार संस्था एएफपीले जनाएको छ ।
यस्तो पर्खाल लगाउन चाहेका थिए ट्रम्पले मेक्सिकोको सीमामा
डोनाल्ड ट्रम्पले सन् २०१६ को निर्वाचनका समयमा मेक्सिकोको सीमामा पर्खाल लगाउने घोषणा गरेका थिए । अमेरिकी सञ्चारमाध्यमका अनुसार ट्रम्पले करेन्ट तथा काँडेतारसहितको पर्खाल लगाउने अवधारणा ल्याएका थिए । जसमा वरिपरी पोखरी बनाउने र त्यहाँ गोही लगाएतका विषालु जलचर राखिने बताएका थिए । अमेरिका र मेक्सिकोको सीमा ३ हजार ६ सय किलोमिटर लामो छ, जुन प्रशान्त महासागरसम्म फैलिएको छ ।
