यतिबेला मध्यपूर्व गाजापट्टिमा इजरायल र हमासबीच भिषण युद्ध भइरहेको छ । इजरायलले प्यालेस्टाइनी लडाकु समूह हमासविरुद्ध युद्धको औपचारिक घोषणा गरेको छ । प्यालेस्टाइनी लडाकुले इजरायली भूभागमा घुसपैठ गरी आक्रमण गरेपछि इजरायल सरकारले आइतबार हमासविरुद्ध युद्धको औपचारिक घोषणा गर्ने निर्णय गरेको हो ।
इजरायल र हमासबीच युद्ध सुरुभएसँगै अमेरिकाले पनि चासो बढाएको छ । इजरायललाई सघाउन पठाइएका अमेरिकी युद्धक विमान अन्तिम समयमा आएर इजरायली क्षेत्रमै फर्काइएका छन् । यसबाट अमेरिका युद्धमै होमिनबाट पछि हटेपनि त्यो सम्भावना टरिसकेको छैन ।
प्यालेस्टाइन कट्टरपन्थी समूह हमासले आक्रमण गरेपछि इजरायलले त्यसको प्रतिकार गर्दै इजरायल युद्धमा भएको घोषणा गरेका थिए। यस बीचमा दुबैतर्फ ठूलो संख्यामा धनजनको क्षति भएको छ । यद्यपि, दुबै पक्षले परस्पर विरोधी संख्या बाहिर ल्याएका छैन जसको स्वतन्त्ररूपमा पुष्टी हुन सकेको छैन ।
यो युद्धले अमेरिकामा पनि एक्कासी तनाव बढेको छ । राजधानी वासिङ्टन डीसी, न्युयोर्कलगायतका ठूला सहरमा सुरक्षा सतर्कता बढाइएको छ । इजरायलको कट्टर समर्थक अमेरिकाले हमासलाई आतंककारी भन्दै आएको छ । उसले हमासको यो आक्रमणलाई आतंकवादी कारबाही भन्दै त्यसको प्रतिरोधका लागि इजरायललाई आवश्यक पर्ने सबै सहयोग गर्न तयार रहेको बताएको छ ।
केही समयअघि मात्रै अमेरिकी राष्ट्रपति बाइडेन र इराजयली प्रधानमन्त्री नेतान्यहुबीच फोनमा कुराकानी भएको बताइएको छ । राष्ट्रपति बाइडेन र नेतान्याहूबीच लामोसमयदेखि व्यक्तिगत रूपमा सौहाद्रपूर्ण सम्बन्ध रहदैआएको छ । अमेरिकाको चुनावमा यहुदी फ्याक्टरको अहम भूमिका हुन्छ । राष्ट्रपतिमा जित्न यहुदी समर्थन लगभग अनिवार्य नै हुन्छ । त्यो समर्थन पाउँन पनि राष्ट्रपति बाइडेन इजरायललाई सहयोग गर्न तत्पर हुनु अस्वभाविक हैन ।
यहि मेसोमा अमेरिकाले इजराइलका लागि नयाँ सैन्य सहयोगको घोषणा गर्ने सम्भावना रहेको अमेरिकी विदेशमन्त्री एन्टोनी ब्लिङ्केनले बताइसकेका छन् । अमेरिका इजराइलका लागि निकट सहयोगी र हातहतियारको प्रमुख पनि आपूर्तिकर्ता हो । हमासबाट भएको इजराइलमाथि आक्रमणको सामना गर्न यो क्षणमा आवश्यक पर्ने सबै कुरा उपलब्ध गरान अमेरिकी राष्ट्रपति जो बाइडेनले निर्देशन समेत दिइसकेका छन् ।
