एजेन्सी । पाकिस्तानका पूर्वप्रधानमन्त्री इमरान खानले आफ्नो दाहिने खुट्टाबाट तीनवटा गोली निकालिएको बताएका छन् ।
अस्पतालबाट डिस्चार्ज भइसकेपछि एक अन्तरवार्तामा पूर्वप्रधानमन्त्री खानले आफ्नो खुट्टाबाट तीनवटा गोली निकालिएको बताएका हुन् ।
उनले भनेका छन्, ‘उनीहरूले मेरो दाहिने खुट्टाबाट तीनवटा गोली निकाले । बायाँ खुट्टामा केही छर्राहरू थिए जुन उनीहरूले भित्र छोडेका थिए ।’ केहि दिनअघि एक राजनीतिक र्यालीमा खानमाथि गोली प्रहार भएको थियो ।
आफूविरुद्धको हत्याको सम्पूर्ण षड्यन्त्र दुई महिनाअघि गरिएको उनले दाबी गरे । आफूले गुप्तचर निकायबाट सूचना प्राप्त गरेको उनले बताए । ‘सम्झनुहोस् म साढे तीन वर्ष सत्तामा थिएँ । मेरो गुप्तचर एजेन्सी र विभिन्न एजेन्सीहरू सञ्चालन गर्नेहरूसँग सम्पर्क छ’, उनले भने ।
