काठमाडौं । नेपाल विद्यार्थी संघ (नेविसंघ)को केन्द्रीय तदर्थ समितिप्रति असन्तुष्ठ समुहले पार्टीको केन्द्रिय कार्यालय सानेपामा रिले अनसन सुरु गरेको छ । विधान सम्मत केन्द्रीय समिति विस्तार गर्नेपर्ने माग गर्दै समितिले पार्टीको केन्द्रिय कार्यालयमा बुधबार दिउँसो ४ बजेदेखी रिले अनसन सुरु गरेको हो ।
केही दिनअघि मात्रै नेविसंघको केन्द्रीय तदर्थ समिति गठन गरिएको थियो । उक्त समिति समावेशी नभएको जनाएको छ । सक्रिय कार्यकर्तालाई छुटाइएको र नेता निकटका व्यक्तिलाई राखिएको भन्दै असन्तुष्ट पक्षले अनसन सुरु गरेको हो ।
हाल रिले अनसनमा २-२ जना १२-१२ घण्टाको दरले बस्दै आएको असन्तुष्ट पक्षका दिपक ओझाले बताए । आफ्नो माग पुरा नभएसम्म अनसन जारी रहने उनले बताए ।
उनीहरुले तदर्थ समिति अवैधानिक भएको आरोप समेत लगाएका छन् । उनीहरुले नेविसंघको केन्द्रीय कार्यसमिति विधानसम्मत सबैको प्रतिनिधित्व हुनेगरी समावेश गर्न माग गरेका छन् । नेविसंघलाई पूर्णता दिन पनि उनीहरुले माग गरेका छन् ।
