१. तिमीमै त्यो केन्द्र छ जहाँबाट सत्यको अनुभूति गर्न सकिन्छ, परमात्मा चिन्न सकिन्छ । त्यो केन्द्र तिम्रो जीवनको मूल ऊर्जा केन्द्र हो, जसका कारण तिमी छौ । त्यस केन्द्रसँग जोडियौ र त्यसतर्फको यात्रा गर्न पायौ भने मुक्तिको द्वार खुल्नेछ । त्यो तिम्रो परम स्वतन्त्रताको द्वार हो, जो असीमित छ, जहाँ आनन्द नै आनन्द छ । त्यो परमात्माको घर हो ।
२. म तपाईंलाई यति प्रेम गर्छु कि तपाईंमा म परमात्मा देख्दछु । त्यसैले तपाईंहरुसँग भन्दछु कि पुल पारी जाउँ जहाँ केही घट्ने छ, समाधि घट्छ, साक्षात्कार घट्छ । त्यो घट्नका निम्ति अवसर त दिउँ ।
३. तिमीमा परिवर्तन चाहन्छु । झुटो अवस्था, आशा, विश्वासबाट उम्किएर कर्म गर । कर्म नै तपस्या हो, पूजा हो, भक्ति हो, ज्ञान हो र योग हो । कर्मले नै जीवनलाई महान् बनाउँछन् । कर्म नै जीवनका हर पथमा काम लाग्दछन् ।
४. हरेक स्थिति–परिस्थितिमा रमाउ, त्यसलाई स्वीकार गर, त्यसैलाई प्रभुको कृपा ठान । मनलाई शान्त र सन्तुष्ट राख । सत्यको वास्तविक खोज त्यही हुन सक्छ । तिमीले आत्मशक्तिलाई जगाउनु छ, जसरी जामवन्तले हनुमानलाई जगाएका थिए ।
५. शीरलाई आफ्नो नठान किनभने यसले साथ छोडिदिन्छ । यो हाड–मासु–रगतको पिण्डलाई उपयोगमा ल्याऊ । सांसारिक मोहलाई त्याग, यो नश्वर छ । आफ्नो खोजमा हिँड । मन र इन्द्रियलाई छोडेर भाग, बुद्धि र आत्मासँग सम्बन्ध बनाउ । यसरी आत्मशक्तिको जागरण हुन्छ र तिमीमा दिव्यताको प्रादुर्भाव हुनेछ । मनको कुरा नमान, यसले त बुद्धिसँग सल्लाह लिएर तिमीलाई दुःखी बनाउने छ । मनले त काम, क्रोधादिसँग जोडिदिन्छ ।
६. परिवारको आशक्ति, गुरु सेवाको आसक्तिले निष्काम कर्मलाई सकाम बनाइदिन्छ । ज्ञान श्रेष्ठ हैन, आचरण श्रेष्ठ हो । पूर्वजन्मको विचार त्याग र भविष्यलाई पनि बिर्सिदेऊ । आफू बसेको नर्कलाई पनि बिर्स । वर्तमानले तिमीलाई बाटो देखाउँछ । आफ्नो मनलाई अन्तर्दिशा देऊ ।
साभारः ‘महापुरुषहरुका अमर वाणी’ पुस्तकबाट
