काठमाडौं । राष्ट्रिय स्वतन्त्र पार्टीको केन्द्रीय कार्यालय बिहीबारदेखि बालाजुमा सर्ने भएको छ । बसुन्धराको पार्टी कार्यालय साँघुरो भएको भन्दै रास्वपाले बालाजुमा भव्य बंगला भाडामा लिएको हो ।
बसुन्धराको पार्टी कार्यालयमा धेरै कोठा नभएको, ठाउँ पनि साँघुरो तथा नेताहरूका लागि कोठाहरु पनि अपुग भएपछि रास्वपा भव्य घरको खोजीमा थियो । सोहीअनुसार रास्वपाले बालाजुमा घर भेटाएको हो । उसको पार्टी कार्यालय भवन अन्य दलको भन्दा भव्य देखिएको छ । रास्वपाले पार्टीको झन्डाकै रंग कार्यालयमा पनि लगाएको छ ।
बालाजुमा रहेको डा। भरतमणि देवकोटाको घरमा कार्यायल सार्न लागिएको हो। उक्त घरको मासिक तीन लाख ५० हजार भाडा तिर्ने सम्झौता भएको छ।
मुकुल प्रवक्ता ढकालले अहिले भइरहेको कार्यालय सानो भएको भन्दै पार्टीका बैठकसमेत गर्नका लागि पर्याप्त नभएकोले सर्न लागिएको बताए। उनका अनुसार अब सर्न लागिएको पाँच तले भवनमा केन्द्रीय समितिको सबै बैठक गर्न पर्याप्त स्थान हुनेछ। रास्वपाले पार्टी स्थापनाको एक वर्ष पुगेका अवसरमा बिहीबारदेखि सप्ताहव्यापी कार्यक्रमको आयोजनासमेत गर्न लागेको छ।
रास्वपाले कुनै भ्रातृसंगठन नबनाउने निर्णय गरेको छ । त्यसैले उसका लागि धेरै ठाउँ चाहिँदैन । रास्वपाले सदस्यता वितरणबाट मात्रै २० करोड आम्दानी गरेको छ ।
उसले हालसम्म दुई लाख सदस्यता पुगेको जनाएको छ । एक हजारको दरले दुई लाख सदस्यबाट २० करोड जम्मा हुन्छ । त्यसैले रास्वपा अबको केही समयमै देशकै सबैभन्दा धनी पार्टीमा रुपान्तरित हुने निश्चित छ । किनभने पार्टीका कार्यालय जिल्ला र प्रदेशमा नराख्ने भएकाले उसको खर्च खासै हुँदैन । सदस्यता वितरणबाट आएको पैसा सबै बचत हुन्छ ।
