काठमाडौं । माओवादी, एकीकृत समाजवादी, जसपा र विप्लव नेकपा मिलेर सोमबार समाजवादी मोर्चा गठन हुँदैछ । आज दिउँसो ३ बजे राष्ट्रियसभामा मोर्चाको घोषणा हुँदैछ । मोर्चामा तीन पार्टीका ५४ सांसद हुनेछन् ।
अहिले मोर्चा मात्र भनिए पनि कालान्तरमा यसलाई पार्टीको रूपमा परिणत गरिने भएको छ । अंग्रेजीमा यसलाई सोसियल फ्रन्ट नेपाल नाम राखिएको छ ।माओवादी अध्यक्ष पुष्पकमल दाहाल प्रचण्ड धेरैअघिदेखि पार्टीको नाम परिवर्तन गर्न चाहन्थे । उनी पार्टीको नामबाट माओवादी र कम्युनिस्ट दुवै हटाउन चाहिरहेका थिए ।
संयोगले डा.बाबुराम भट्टराईले समाजवादी मोर्चा बनाउने प्रस्ताव गरे । त्यसलाई नै प्रचण्डले पार्टीको नाम फेर्ने उपयुक्त मौका पाएका हुन् । तर प्रचण्डले समाजवादी मोर्चामा बाबुरामलाई सहभागी गराएका छैनन् । मोर्चामा बाबुराम जसपा अध्यक्ष उपेन्द्र यादवको असहमतिका कारण अटाउन नसकेको बताइन्छ ।
नेत्रविक्रम चन्द विप्लवलाई माओवादीको महासचिव बनाउन सजिलो हुने ठानेर रणनीतिक हिसाबले नै प्रचण्डले बाबुरामलाई नसमेटेको बताइन्छ । यदि बाबुरामले सदासयता नदेखाएको भए मंसिरको निर्वाचनमा प्रचण्डको चुनाव क्षेत्र नै हुँदैनथ्यो । बाबुरामले गोरखा २ छाडिदिएकाले प्रचण्डले चुनाव जितेका हुन् ।
चितवन ३ बाट उठ्ने तयारी गर्दैगर्दा राष्ट्रिय स्वतन्त्र पार्टीका सभापति रवि लामिछानेले प्रचण्डविरुद्ध उम्मेदवारी दिने भनेपछि उनी गोरखा २ पुगेका हुन् । गोरखा २ कांग्रेसको बलियो गढ भएको निर्वाचन क्षेत्र हो । बाबुरामले विगतमा पनि कांग्रेसकै सहयोगमा चुनाव जितेका थिए । यसपटक प्रचण्डले कांग्रेस र बाबुरामको सहयोगमा चुनाव जितेका हुन् ।
तर भित्री कथा भने अरु पनि रहेको स्रोतले बताएको छ । नेपाली कांग्रेसलाई तर्साउन र एमालेसँग मुकाबिला गर्न समाजवादी मोर्चा गठन गरेको प्रस्टै छ । सहयात्री दल कांग्रेसँग पनि बार्गेनिङ गर्न मोर्चा गठन गरेका छन् । जसलाई लिएर अहिले सत्तारुढ दलमै खटपट सुरु भएको छ ।
प्रचण्डको समाजवादी मोर्चा गठन गर्ने निर्णयले कांग्रेस र एमालेलाई नजिक्याउँदै लगेको राजनीतिक विश्लेषकहरूको भनाइ छ । स्रोतका अनुसार प्रचण्डले पाउने तीन वर्षे प्रधानमन्त्री कार्यकालको पछिल्लो एक वर्ष माधव नेपाललाई प्रधानमन्त्री बनाउने, त्यसपछि माओवादी र एकीकृत समाजवादीबीच एकता हुने र प्रचण्डलाई पार्टी अध्यक्ष बनाएर विप्लवलाई मोर्चाको महासचिव बनाउने गरी भित्री रणनीति अख्तियार गरिएको छ ।
एकीकृत समाजवादीका अधिकांश नेता कार्यकर्ता एमालेमा जाने भएपछि माधवले हतार हतार समाजवादी मोर्चा गठन गरेर नेता कार्यकर्ता रोक्न खोजेका छन् ।
