काठमाडौं । संसदीय सुनुवाइ विशेष समितिको बैठकमा उजुरीकर्ताले नाराबाजी गरेका छन् । प्रधानन्यायाधीशमा प्रस्तावित हरिकृष्ण कार्कीविरुद्ध उजुरी हालेका दुई दर्जनभन्दा बढी उजुरीकर्ताले सदनले संशोधन गरेको संयुक्त समिति नियमावली राजपत्रमा प्रकाशित नभएकाले सुनुवाइ ने अवैध जिकिर गर्दै छलफलमा सहभागी हुन अस्वीकार गरेका छन् ।
समितिले भित्रबाट नाम बोलाए पनि उजुरीकर्ता सहभागी भएनन् । समितिले एकजना उजुरीकर्तालाई १९ मिनेटको समय दिएर आफ्नो भनाइ राख्न आग्रह गरेको थियो ।
तर, उजुरीकर्ताहरूले समिति सभापति पशुपतिशम्शेर जबरासँग राजपत्रमा प्रकाशित संयुक्त नियमावली माग गर्दै पाँच बुँदे ज्ञापनपत्र बुझाउँदै छलफलमा सहभागी हुन अस्वीकार गरेका छन् । जसकारण उजुरीकर्तासँगको छलफल प्रभावित भएको छ ।
समितिले आज उजुरी हाल्ने २९ जना उजुरीकर्तासँगै छलफल गर्ने र बिहीबार कार्कीसँग सुनुवाइ गरेलगत्तै उनको नाम प्रधानन्यायाधीशमा अनुमोदन गर्ने तयारी गरेको थियो ।
तर संसदीय सुनुवाइ समिति गठन भएको विषय राजपत्रमा प्रकाशित नभएकाले समिति नै अवैध भएको उजुरीकर्ताको जिकिर छ । यसले फेरि अर्को कानुनी लफडा सुरु भएको छ ।
