काठमाडौं । प्रधानमन्त्री पुष्पकमल दाहाल ‘प्रचण्ड’ले सीमा समस्या समाधानका लागि आफूले प्रष्टताका साथ कुरा राखेको बताएका छन् ।
भारत भ्रमणबारे प्रतिपक्षी तीन दलले प्रश्न उठाएपछि सोमबार प्रतिनिधिसभा बैठकमा बोल्दै उनले समकक्षी नरेन्द्र मोदीसँग सीमा समस्यासम्बन्धी विषयलाई स्थापित कूटनीतिक संयन्त्रमार्फत् समाधान गर्न आग्रह गरेको बताएका हुन् ।
‘हाम्रो भेटवार्तामा मैले सीमा समस्यासम्बन्धी विषयलाई कुटनीतिक संयन्त्रमार्फत समाधान गर्न भनेको थिए । मोदीजीले सीमा लगायत थाँती रहेका विषय समाधान गरिनेछ भन्नु भएको छ । उहाँले सीमाबारे लामो समयपछि स्पष्ट बोलेको यो पहिलो पटक हो,’ उनले भने ।
प्रधानमन्त्री ‘प्रचण्ड’ले आफ्नो भारत भ्रमण द्विपक्षीय सम्बन्धलाई बलियो बनाउनेमा केन्द्रित रहेको पनि बताए । ‘भ्रमण आगामी दिनमा द्विपक्षीय सम्बन्धलाई बलियो बनाउनेमा केन्द्रित रह्यो । विशेष गरी आर्थिक मामिलामा राष्ट्रको दीर्घकालीन हितमा सम्झौताहरू भएका छन् भने राजनीतिक मामिलामा आपसी विश्वास बढाउँदै छलफल र वार्ताद्वारा निकास खोज्ने दिशामा अर्थपूर्ण प्रतिबद्धता व्यक्त भएका छन्,’ उनले भने ।
