पोखरा । कास्कीको लेखनाथस्थित बेगनास ताल पारी रहेको प्राचीन बराह क्षेत्रमा गण्डकी प्रदेश सरकारको सहयोगमा मन्दिर निर्माण सुरु भएको छ । गण्डकी प्रदेश सरकारको पर्यटन तथा उद्योग कार्यालय कास्कीले बेगनासताल बराहक्षेत्र पर्यटकीय पूवर्पाधार निर्माण योजना अन्तर्गत बेगनासताल बराह एवम् लक्ष्मी नारायण मन्दिर निर्माण गर्न सुरु गरिएको हो ।
योजनाका लागि कुल ५५ लाख ७६ हजार ९१७ रुपैयाँ लागत लाग्नेमा गण्डकी प्रदेश प्रदेश सरकारबाट ५० लाख रुपैयाँ र जनश्रमदानबाट पाँच लाख ७६ हजार ९१७ रुपैयाँ विनियोजन गरिएको छ । बेगनास ताल बराह क्षेत्रलाई धार्मिक पर्यटनको गन्तव्य बनाउनका लागि व्यवस्थित मन्दिर निर्माण गर्न लागिएको बेगनासताल बराह क्षेत्र पर्यटकीय पूर्वाधार निर्माण समितिका अध्यक्ष ध्रुबनाथ अधिकारीले जानकारी दिनुभयो ।
बराह क्षेत्रमा प्राचीनकालदेखि नै पूजाआजा हुँदै आएको र यहाँ कलात्मक कुँदिएका शिला रहेका कारण यस क्षेत्रको पुरातात्विकरुपमा पनि उत्तिकै महत्व रहेको मानिन्छ । बराह क्षेत्रको पुरातात्विक खोज तथा अनुसन्धानका लागि यस अघि पुरातत्व विभागका प्राविधिकसमेत आएर यहाँको अध्ययन समेत गरेका थिए । बेगनास तालमा आउने पर्यटकलाई यहाँस्थित बराह क्षेत्रमा समेत पु¥याउने लक्ष्यका साथ मन्दिर लगायतका संरचना निर्माण गर्न लागिएको अध्यक्ष अधिकारीले बताउनुभयो ।
प्राचीन कालदेखि अत्यन्त आस्था विश्वासका साथ पूजाआजा गरिदै आइएको यस तीर्थस्थलमा डुङ्गा व्यवसायी समितिले प्रत्येक वर्षको पहिलो पूर्णिमाका अवसरमा ताल क्षेत्रमा डुङ्गा दुर्घटना नहोस्, आगन्तुक पर्यटक, दर्शनार्थी तथा स्थानीयवासी सबैलाई राम्रो होस् भन्ने कामना गर्दै पूजाआजा गर्दै आएका छन् । मनले चिताएको पुग्ने जनविश्वासका साथ यस क्षेत्रमा विभिन्न महत्वपूर्ण तिथिमिति एवं पर्वमा दर्शनार्थी आउने यस तीर्थस्थल र आसपासको क्षेत्रको विकासका लागि २०७५ मङ्सिर २२ गतेदेखि २९ गतेसम्म बेगनासताल क्षेत्रमा महायज्ञ समेत गरिएको उहाँले जानकारी दिनुभयो ।
मन्दिरको एक कार्यक्रमका बीच आज शिलान्यास गर्दै गण्डकी प्रदेशका पर्यटन तथा उद्योग मन्त्री दीपेन्द्रबहादुर थापाले बेगनासातालको गरिमा र महत्वलाई अझै बढाउन मन्दिर महत्वपूर्ण बन्ने बताउनुभयो । बेगनासताल सहित यस क्षेत्रको पर्यटकीय विकासका लागि मन्त्रालयका तर्फबाट सक्दो सहयोग गर्ने उहाँले बताउनुभयो ।
पोखरा महानगरपालिका वडा नं ३१ का वडा अध्यक्ष ढकनाथ कँडेलले बेगनास तालको प्राकृतिक सम्पदाको संरक्षणका साथै यहाँका बेगनास बराह लगायतका धार्मिक पर्यटकीय क्षेत्रको संरक्षणमा वडाले सहयोग गर्ने विश्वास व्यक्त गर्नुभयो ।
लेखनाथ उद्योग वाज्यि संघका अध्यक्ष छत्रधर आत्रेयले लेखनाथ क्षेत्रका धार्मिक एवम् पर्यटकीय गन्तव्यको संरक्षण एवम् प्रवद्र्धनमा सबैको सहयोग जरुरी भएको बताउनुभयो ।कार्यक्रममा इलाका प्रशासन कार्यालय शिसुवाका प्रमुख कमल भण्डारी, अर्थ मन्त्रालयका उपसचिव वसन्तराज तिवारी, उद्योग तथा पर्यटन कार्यलय कास्कीका प्रमुख शेषकान्त पौडेल लगायतले बेगनास बराहलाई धार्मिक पर्यटनको आकर्षक गन्तव्यका रुपमा विकास गर्नु जरुरी रहेकोमा जोड दिनुभयो ।
