काठमाडौं । राष्ट्रिय स्वतन्त्र पार्टीले आफूलाई कांग्रेस, एमाले, माओवादीभन्दा फरक रहेको भन्दै पृथक् देखाउने बताउँदै आएको छ । तर नेताहरू भने पुरानै दल जस्तै भारतीय र चिनियाँ नेतासँग भेटघाटमा लागेका छन् ।
रास्वपाका सभापति लामिछानेले केही दिनअघि भारतीय प्रधानमन्त्री नरेन्द्र मोदीका भाइ प्रह्लाद दामोदर मोदीसँग भेटवार्ता गरेका थिए । कुपण्डोलस्थित होटल हिमालयमा रहेका मोदीलाई लामिछाने एक्लै गएर भेटेका थिए । त्यसबेलै समाचार आए पनि रास्वपाले भेट नभएको दाबी गर्दै आएको थियो ।
तर बिहीबार रवि र प्रह्लाद मोदीबीच भेट भएको तस्बिर सामाजिक सञ्जालमा भाइरल बनेको छ । मोदी विश्व हिन्दू महासंघ भारत च्याप्टरका अध्यक्ष हुन् । उनले रविसँग नेपाललाई हिन्दु राष्ट्र बनाउने अभियानमा साथ दिन आग्रह गरेका थिए । स्रोतका अनुसार रविले त्यसमा आफ्नो पूरा साथ रहने प्रतिबद्धता जनाएका थिए ।
गत पुसमा उपप्रधानसहित गृहमन्त्री बनेपछि रविले नेपाल प्रहरी, सशस्त्र प्रहरी बल र राष्ट्रिय अनुसन्धान विभागलाई मन्त्रीस्तरीय निर्णयबाट राजनीतिक नेतृत्व, विदेशी कूटनीतिक नियोगका प्रतिनिधिहरुसँग व्यक्तिगत भेटमा रोक लगाएका थिए । उनले तोकिएका अधिकारीसँग स्वीकृति लिँदै विषयवस्तुको पूर्वजानकारी गराएर मात्र भेटघाट गर्न कडा निर्देशन जारी गरेका थिए । तर अहिले आफैँले विदेशीसँग गोप्य भेट गर्नुलाई धेरैले अर्थपूर्ण र दोहोरो मापदण्ड भनेका छन् ।
बिहीबार रास्वपाका नेताहरूले चिनियाँ दूतावासका पदाधिकारीसँग भेटवार्ता गरेका छन् । चिनियाँ दूतावासका उपप्रमुख ९डिसिएम० वाङ सिन रास्वपाको पार्टी कार्यालय पुगेका थिए । वाङ दूतावासका अर्का एकजना कूटनीतिक कर्मचारीसँगै रास्वपा कार्यालय,बसुन्धरा पुगेका हुन् । चिनियाँ कूटनीतिज्ञहरुलाई पार्टी उपसभापति तथा सांसद डिपी अर्यालले स्वागत गरेक हुन् । यो भेटलाई रास्वपाले नियमित राजनीतिक भेटको रूपमा अथ्र्याएको छ ।
