अभिमान के हो ?
अहङ्कार नत्यागी शान्ति, प्रसन्नता पाइँदैन । सजगता नआई अहं त्यागिँदैन । एक्लै नभए सजगता आउँदैन । लोभ, मोह, स्वार्थ, सुविधा, चाहे एक्लै भइँदैन । बाहिरको प्रपञ्च, मित्रको कल्पना नहुनु एक्लै हो । सम्बन्ध नभई जीवन छैन । सम्बन्धमा निरन्तरता र पक्षपात नभए द्वन्द्व छैन । इन्द्रियको सुखमा राग नभए पक्षपात छैन । सबै भेद राम्रो नराम्रो अन्तःकरण र इन्द्रियबाट जन्मेका हुन्छन् ।
अन्तःकरण र इन्द्रियहरूको मेल नभए वासना, तृष्णा (अधिक होस् सदा रहोस्, मेरै होस् भन्ने) जन्मिँदैन । सबै सम्बन्ध रहोस्, कर्म होस् तृष्णाको जन्म नहोस्, जीवनको सार्थकता भयो ।
वार्तामा विवाद अहङ्कारले गर्दा भएको हो । मैले भनेको मान भन्नु अहङ्कारले हो । किन यसो भन्यौ भन्नु अहङ्कारले हो । उसले अहङ्कार त्यागेन तिमीले अहं त्यागिदेऊ । अहं त्याग्न नसके अरू केही त्यागेर प्रसन्नता पाइँदैन । जहाँ भए पनि, जो साथमा भए पनि, जे भने पनि, जे गरे पनि अहङ्कार साथै रहन्छ ।
म, मेरो, अधिक, सर्वदा, यस्तै होस् यी पाँच भावनाले अहङ्कारलाई पुष्टिदिन्छ । यी भावहरूको अहङ्कार आत्मा हो । स्थित आत्मा परमात्मा हो, यो पारख पद पारखीको स्वभाव हो ।
साभारः ‘विचारप्रवाह’ पुस्तकबाट
