काठमाडौं । नक्कली भुटानी शरणार्थी प्रकरणमा प्रहरीले पक्राउ पुर्जी जारी भएपछि एमाले सचिव तथा पूर्वमन्त्री टोपबहादुर रायमाझी फरार भएका छन् । पाँच दिनसम्म पनि सम्पर्कमा नआएपछि प्रहरीले उनलाई पक्रन देशभर परिपत्र गरेको छ ।
जिल्ला प्रहरी परिसर काठमाडौंले सबै जिल्ला प्रहरी कार्यालयलाई यससम्बन्धी परिपत्र गरेको हो । साथै पक्राउका लागि केन्द्रीय अनुसन्धान ब्युरो ९सिआइबी०लगायतका निकायबाट पनि प्रहरी परिचालन गरिएको छ ।
आफूविरुद्ध पक्राउ पुर्जी जारी भएको समाचार सार्वजनिक हुँदा गत बुधबार रायमाझी अर्घाखाँचीको एक कार्यक्रममा सभामुख देवराज घिमिरेसँगै थिए । त्यही दिन उनी ‘काठमाडौं गएर प्रहरीलाई सघाउने’ भन्दै काठमाडौंका लागि हिँडेका थिए । तर, सोही दिन छोरा सन्दीप पक्राउ परेपछि उनी बिहीबार बिहानदेखि फरार भएका थिए । प्रहरीकै सूचनाबाट रायमाझी फरार भएको बुझिएको छ ।
रायमाझीले प्रहरी महानिरीक्षक बसन्तराज कुँवरलाई फोन गरेर ठगीमा आफ्नो संलग्नता नरहेको र प्रहरीलाई अनुसन्धानमा सघाउने बताएका थिए । तर त्यही दिनदेखि मोबाइल फोन अफ गरेर उनी भैरहवाबाटै फरार भएका थिए । प्रहरीले भारत भागेको आशंका गरेको छ । प्रहरी स्रोतका अनुसार रायमाझी अहिले गोरखपुर पुगेका छन् ।
उनी त्यहीँ लुकेर बसेका छन् । अब भारतीय प्रहरीसँग समन्वय नगरी रायमाझी पक्राउ पर्ने सम्भावना देखिएको छैन । त्यसमाथि एमाले अध्यक्ष केपी ओलीले प्रधानमन्त्री पुष्पकमल दाहाल प्रचण्डलाई पटकपटक भेटेर रायमाझीलाई पक्राउ नगर्न दबाब दिँदै आएका छन् । त्यसैले अब रायमाझीलाई अदालतमा मुद्दा कमजोर पारेर दर्ता भएपछि मात्रै झिकाइने तयारी भएको छ ।
